कोशी प्रदेशमा डेङ्गी संक्रमण तीव्र : सावधानी अपनाउन चिकित्सकको आग्रह

असार २८, सोलुखुम्बु । कोशी प्रदेशमा डेङ्गी संक्रमण तीव्र रुपमा फैलिँदै गएको छ। इपिडिमियोलोजी तथा रोग नियन्त्रण महाशाखाका पछिल्ला तथ्याङ्कअनुसार, कोशी प्रदेशमा हालसम्म ३५३ जना डेङ्गी संक्रमित भेटिएका छन्। यो सङ्ख्या प्रदेशका लागि चिन्ताजनक अवस्थामा पुग्दै गएको संकेत हो। देशभर फैलिएको डेङ्गी संक्रमण हालसम्म ७३ जिल्लामा फैलिएको छ।

गण्डकी प्रदेशमा सबैभन्दा बढी ४६४ जना संक्रमित फेला परेका छन् भने बागमतीमा ४४१, कोशीमा ३५३, लुम्बिनीमा ३०५, सुदूरपश्चिम प्रदेशमा २६८, कर्णालीमा ३६ र मधेश प्रदेशमा ३४ जनामा डेङ्गी संक्रमण पुष्टि भएको छ।

चिकित्सकहरूका अनुसार लामखुट्टेको टोकाइबाट सर्ने यो रोग विशेषगरी मनसुनको समयमा तीव्र रुपमा फैलिने गर्छ। डेङ्गीका लक्षणहरूमा उच्च ज्वरो, टाउको दुखाइ, आँखा वरिपरि पीडा, मासपेशी र हड्डी दुख्ने, बान्ता लाग्ने तथा शरीरमा र्याश देखिनु प्रमुख छन्।