ओखलढुंगामा ५ जनामा नयाँ कालाजारको संक्रमण पुष्टि

असार २८, सोलुखुम्बु । ओखलढुंगामा पाँच जनामा नयाँ कालाजारको संक्रमण पुष्टि भएको छ । जिल्ला स्वास्थ्य कार्यालय ओखलढुंगाका महामारी रोग फोकल पर्सन राकेश पटेलका अनुसार चालु आर्थिक वर्ष २०८१÷०८२ को हालसम्म संक्रमितमध्ये चार जना महिला र एक जना पुरुष रहेका छन् । पुष्टि भएका संक्रमितमध्ये तीन जनामा ओखलढुंगा सामुदायिक मिसन अस्पतालमा र दुई जनामा काठमाडौँमा संक्रमण पुष्टि भएको हो ।

मिसन अस्पतालमा उपचाररत बिरामीहरूमध्ये मानेभञ्ज्याङ गाउँपालिका–५, उदयपुरका ५५ वर्षीय चित्रबहादुर राई र १५ वर्षीया रियाना राई रहेका छन् । त्यस्तै, मानेभञ्ज्याङ गाउँपालिका–६, हिलेपानीका २२ वर्षीया आशा मगर र २३ वर्षीया जीवनकुमारी राई रहेका छन् । काठमाडौँमा बसोबास गर्दै आएकी मोलुङ गाउँपालिका–२, रामपुरकी ३० वर्षीया सुजता लुईटेलमा पनि कालाजार पुष्टि भएको छ । फोकल पर्सन पटेलका अनुसार जनचेतनाको अभावले गर्दा कालाजारको नियन्त्रणमा चुनौती थपिएको छ ।

मानेभञ्ज्याङ गाउँपालिकाका स्वास्थ्य संयोजक विश्वराज दाहालका अनुसार सरकारले कालाजार न्यूनीकरणका लागि विविध कार्यक्रम सञ्चालन गर्दै आए पनि नयाँ संक्रमित देखा परिरहनु चुनौती बनेको छ । हाल वर्षमा एकपटक मात्र गरिँदै आएको कीटनाशक छकाई अबदेखि वर्षमा दुईपटकसम्म गरिने योजना रहेको संयोजक दाहालले जानकारी दिनुभयो ।