मिसन अस्पतालमै स्वास्थ्य बीमा सेवा पुनः सुचारु गर्न रास्वपाको ओखलढुंगाको माग

असार ३०, सोलुखुम्बु । राष्ट्रिय स्वतन्त्र पार्टी रास्वपा ओखलढुंगाले मिसन अस्पतालमै स्वास्थ्य बिमा पुनः सुचारु गर्न माग गरेको छ । रास्वपा ओखलढुंगाले सामुदायिक मिसन अस्पताल मै स्वास्थ्य बिमा सेवा पुनः सुचारु गर्न माग गर्दै असार २५ गते एक विज्ञप्ति पत्र जिल्ला प्रशासन कार्यालय ओखलढुंगालाई पठाएको हो । जिल्ला प्रशासन कार्यालयको इमेल र ह्वाट्स्यप मार्फत पत्र पठाएको राष्ट्रिय स्वतन्त्र पार्टी ओखलढुंगाका सभापति कृष्ण थापाले बताउनुभयो ।

रास्वपाले बुझाएको पत्रमा ओखलढुंगा सामुदायिक मिसन अस्पतालमा उपलब्ध भईरहेको स्वास्थ्य बिमा सेवा बन्द हुँदा गरिब तथा विपन्न नागरिक सेवा लिनबाट वञ्चित भएको भएको उल्लेख छ । स्वास्थ्य बिमा दुर्गम तथा आर्थिक विपन्न नागरिकको जीवन रक्षक बन्दै आएकोमा बिमा बन्द हुँदा नागरिकहरु आर्थिक बोझका कारण उपचार गराउन नसक्ने स्थितीमा पुगेको पत्रमा भनिएको छ । संविधानले प्रत्याभुत गरेको स्वास्थ्य सेवामा सबैको समान पहुँच अधिकार गम्भिर असर परेको भन्दै ओखलढुंगा सामुदायिक अस्पताल मै बिमा पुनः सुचारु गर्न पत्रमा भनिएको छ ।

राष्ट्रिय स्वतन्त्र पार्टी जिल्ला समितिका सभापति कृष्ण थापा र सचिव दुर्गा प्रसाद चौरेलले हस्ताक्षर गरेको पत्रमा ओखलढुंगा सामुदायिक अस्पतालमा स्वास्थ्य बिमा पुनः सुचारु हुनु पर्ने माग गरिएको छ । त्यस्तै हालसम्म बिमाबाट वञ्चित नागरिकहरुको स्वास्थ्य उपचारमा आएको समस्याको समाधान गरिनु पर्ने, स्वास्थ्य मन्त्रालय तथा स्वास्थ्य बिमा बोर्डसँग समन्वय गरी प्रक्रिया अघि बढाउनु पर्ने, नागरिकको स्वास्थ्य सेवा अधिकार सुनिश्चित गर्न माग गरिएको छ ।

पछिल्लो समय स्वास्थ्य मन्त्रालय तथा स्वास्थ्य बिमा बोर्डले ओखलढुंगा जिल्लाको जिल्ला अस्पताल ओखलढुंगा रुम्जाटार र रानीवन प्राथमिक स्वास्थ्य केन्द्रमा स्वास्थ्य बिमा अन्र्तगतको सेवा पाउने केन्द्र तोकेको छ ।