हिमाली जिल्ला सोलुमै सफल भयो एपेन्डिसाईटिसको शल्यक्रिया 

असार ३०, सोलुखुम्बु । सोलुखुम्बुको थुलुङ दूधकोशी गाउँपालिकामै एक्युट एपेन्डिसाइटिसको सफल सल्यकृया गरिएको छ । गाउँपालिका स्थित थुलुङ दूधकोशी अस्पतालमा पहिलोपटक ‘एक्यूट एपेन्डिसाइटिस’को सफल शल्यक्रिया गरिएको हो । गाउँपालिकाको वडा नम्बर ६, मुक्ली निवासी ३० वर्षीय अभिषेक राईको सफल शल्यक्रिया गरिएको गाउँपालिका अध्यक्ष तथा अस्पताल व्यवस्थापन समितिका अध्यक्ष असिम राईले जानकारी दिनुभयो ।

गाउँमै गम्भीर अवस्थाका विरामी अभिषेकको सफल उपचार भएपछि गाउँपालिकाले खुसी बाँडेको छ ।  गाउँपालिका अध्यक्ष राइले भन्नुभयो ‘ग्रामीण क्षेत्रमा यस किसिमको शल्यक्रिया हुनु अत्यन्तै सुखद अवस्था हो’, ‘यो सफलताले छिमेकी गाउँपालिका र खोटाङका समेत सेवाग्राहीलाई ठूलो राहत मिल्नेछ ।’ उहाँका अनुसार शल्यक्रिया गरिएका बिरामीको आपतकालिन शल्यक्रिया केही समय ढिला भएको भए मृत्यु हुनसक्थ्यो ।

आइतबार मध्यराति अस्पताल पु¥याइनुभएका अभिशेक राईको  आपतकालिन शल्यक्रिया गरिएको अस्पतालकी संयोजक कोपिला श्रेष्ठले बताउनुभयो ।  शल्यक्रिया गर्दा राईको एपेन्डिसाइटिस फुटिसकेको अवस्थामा रहेको संयोजक श्रेष्ठले जानकारी गराउनुभयो । उहाँका अनुसार डा. अजय चौधरी (जनरल प्राक्टिसनर)को नेतृत्वमा ६ जनाको टोलीले करिब ४ घण्टा लगाएर शल्यक्रिया गरेको हो ।

पहिलोपटक थुलुङ दूधकोशी गाउँपालिका जस्तो ग्रामीण स्थानमा एपेन्डिसाइटिसको सफल शल्यक्रिया गर्दा आफूहरू हर्षित र थप हौसला मिलेको संयोजक उहाँको भनाइ छ । शल्यक्रिया गरिनुभएका राईको अवस्था अहिले सामान्य रहेको छ । उहाँलाई ६ दिनपछि डिस्चार्ज गरिने संयोजक श्रेष्ठले बताउनुभयो । यसअघि अस्पतालमा प्रसुतीका लागि शल्यक्रिया गरिएको थियो ।