ओखलढुंगाको जाल्पा मन्दिर नजिक बोलेरो गाडी दुर्घटना, मानवीय क्षति नभएको पुष्टि

असार ३१, सोलुखुम्बु । ओखलढुङ्गाको सिद्धिचरण नगरपालिका–११ स्थित जाल्पा मन्दिर नजिकै बोलेरो गाडी दुर्घटना भएको छ । रमाइलोडाँडाबाट मिलनचोकतर्फ जाँदै गरेको प्रदेश २–०१–००१ च ००९१ नम्बरको बोलेरो गाडी सोमबार दुर्घटनामा परेको हो । गाडीको ब्रेक फेल भएपछि गाडी अनियन्त्रित भई सडकबाट करिब ५ मिटर तल खसेको जिल्ला प्रहरी कार्यालय ओखलढुङ्गाका सूचना अधिकारी विजय कार्कीले जानकारी दिनुभयो ।

दुर्घटनाको खबर प्राप्त हुनासाथ जिल्ला ट्राफिक प्रहरी कार्यालयबाट प्रहरी टोली घटनास्थलमा खटिएको थियो । प्रहरी टोलीले तत्कालै पुगेर आवश्यक अनुसन्धान र व्यवस्थापन गरेको बताइएको छ ।

दुर्घटनामा कुनै मानवीय क्षति नभएको र गाडी हाल घटनास्थलमै रहेको पनि जानकारी दिइएको छ । प्रहरीका अनुसार गाडीको ब्रेक प्रणालीमा देखिएको खराबीका कारण दुर्घटना भएको प्रारम्भिक अनुमान गरिएको छ । यसबारे थप अनुसन्धान भइरहेको प्रहरीले जनाएको छ ।