बालबालिकाको सर्वाङ्गिण विकासका लागि अभिभावक शिक्षा अपरिहार्य : सोलुखुम्बुमा ७ दिने आधारभूत तालिम सम्पन्न

साउन ४, सोलुखुम्बु । “बालबालिकाको सर्वाङ्गिण विकास, अभिभावक शिक्षाले दिन्छ निकास” भन्ने नारासहित सोलुखुम्बु जिल्लाको सदरमुकाम फाप्लुस्थित हिल भ्यु रेष्टुरेन्टमा अभिभावक शिक्षासम्बन्धी ७ दिने आधारभूत तालिम सम्पन्न भएको छ । चाइल्ड एड नेटवर्कको आर्थिक सहयोग तथा सोताङ गाउँपालिकाको आयोजनामा तथा सेतो गुराँस राष्ट्रिय बालविकास सेवा अन्तर्गतको ‘ईसीडी हार्मोनी परियोजना’ मार्फत आयोजित उक्त तालिम साउन ३ गते शनिबार सम्पन्न भएको हो । तालिमको समापन जिल्ला शिक्षा अधिकृत झपट बोहराको विशेष उपस्थिति र सोताङ गाउँपालिका अध्यक्ष खिलराज बस्नेतको अध्यक्षतामा सम्पन्न भएको हो ।

असार २९ गतेदेखि सुरु भएको उक्त तालिममा सोताङ गाउँपालिकाका १ देखि ५ वडासम्मका १८ जना अभिभावक शिक्षा सहजकर्ता, माप्य दुधकोशी गाउँपालिका–६ का २ जना सहजकर्ता, परियोजनाका ६ जना मेन्टर तथा अन्य कर्मचारीसहित जम्मा ३० जनाको सहभागिता रहेको थियो । तालिमको मुख्य उद्देश्य अभिभावक शिक्षाको महत्व बुझाउने, प्रारम्भिक बालविकास (०–८ वर्ष) को अवधारणामा स्पष्टता ल्याउने तथा समुदाय स्तरमा अभिभावक कक्षा सञ्चालनका लागि सहजकर्ताको क्षमता अभिवृद्धि गर्नु रहेको थियो ।

तालिममा कुल ३३ वटा सेसन समावेश गरिएका थिए, जसमा प्रारम्भिक बालविकासका पाँच मुख्य पक्षहरू — शारीरिक, सामाजिक, भावनात्मक, बौद्धिक तथा भाषा विकास — लाई आधार बनाइएको थियो । अभिभावक शिक्षासम्बन्धी ७ दिने आधारभूत तालिमको सहजिकरण सेतो गुरासँ राष्ट्रिय बालविकास सेवा, ललितपुरमा कार्यरत वरिष्ठ तालिम अधिकृत रमा थपलिया, परियोजना संयोजक, कर्ण बहादुर दरै र जिल्ला अधिकृत झपट बोहराले गर्नु भएको थियो ।

तालिममा सहभागीहरूले मन्तव्य राख्दै गर्भावस्था देखिका चरणहरूमा आमा र बच्चाको समुचित हेरचाह, बालबालिकाको प्रारम्भिक वर्षमा गरिनुपर्ने क्रियाकलाप तथा अभिभावकको भूमिकाबारे महत्वपूर्ण ज्ञान प्राप्त भएको बताउनुभयो । एक सहभागीका अनुसार, “बालबालिकाको उज्यालो भविष्य निर्माणमा अभिभावक शिक्षा मार्गदर्शक बन्नेछ ।” समापन समारोहमा बोल्दै गाउँपालिका अध्यक्ष खील राज बस्नेतले शिक्षा क्षेत्र सुधारका लागि राज्यले लगानी गरिरहे पनि अपेक्षित परिणाम नआएकोमा चिन्ता व्यक्त गर्नुभयो । उहाँले भन्नुभयो, “स्थानीय तह, सहयोगी संस्था र विद्यालयबीचको सहकार्यबाट मात्र गुणस्तरीय शिक्षा सम्भव छ ।

” साथै, उहाँले सेतो गुराँसले शिक्षा क्षेत्रमा पुर्याएको योगदानको प्रशंसा गर्दै आगामी दिनमा आवश्यक सहयोग गाउँपालिकाबाट निरन्तर रहने प्रतिबद्धता व्यक्त गर्नुभयो । सोही परियोजनाअन्तर्गत माप्य दुधकोशी गाउँपालिकामा साउन ४ देखि १० गतेसम्म र महाकुलुङ गाउँपालिकामा साउन १२ देखि १७ गतेसम्म अभिभावक शिक्षासम्बन्धी तालिम सञ्चालन गरिने कार्यक्रम तय गरिएको छ ।