जन जागृति माविले गर्यो एसइइ परीक्षामा उत्तीर्ण हुने विद्यार्थीहरूलाई सम्मान

साउन १०, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ५ स्थित जन जागृति माध्यमिक विद्यालयले २०८१ सालको माध्यमिक शिक्षा परीक्षामा उत्कृष्ट जिपीएका साथ उत्तीर्ण भएका सम्पूर्ण विद्यार्थीहरूलाई एक विशेष कार्यक्रमका बीच सम्मान गरेको छ । विद्यालयका प्रधानाध्यापक महा प्रसाद फुयालका अनुसार शुक्रबार आयोजित कार्यक्रममा ९१ जना सहभागी विद्यार्थीमध्ये ८९ जना उत्तीर्ण भएका विद्यार्थीहरूलाई प्रमाणपत्र, खादा तथा अविर लगाएर बधाइका साथ सम्मान गरिएको हो । कार्यक्रममा विद्यालयका शिक्षक, अभिभावक तथा विद्यार्थीहरूको उपस्थिति रहेको थियो ।

प्रधानाध्यापक फुयालले उत्तीर्ण विद्यार्थीहरूलाई बधाई ज्ञापन गर्दै भविष्यको शैक्षिक यात्रामा अझ उत्कृष्ट उपलब्धिको कामना गर्नुभयो । विद्यालय परिवारले एसईईमा सफलता प्राप्त गरेका सम्पूर्ण विद्यार्थीप्रति गर्व व्यक्त गर्दै उनीहरूको आगामी शैक्षिक जीवन सफल रहोस् भन्ने शुभकामना व्यक्त गरेको छ । यस सम्मान कार्यक्रममा विद्यालयको निरन्तर सुधार हुँदै गएको शैक्षिक स्तरको पनि चर्चा गरिएको थियो । जन जागृति माविले आगामी दिनहरूमा अझ गुणस्तरीय शिक्षा प्रदान गर्दै विद्यार्थीहरूलाई प्रतिस्पर्धात्मक रूपमा सक्षम बनाउने लक्ष्य लिएको जनाएको छ ।