खोटाङको रैथाने कोदोबाट व्यावसायिक ’दिक्तेल कोदो बिस्कुट’ उत्पादन सुरु

साउन १७, सोलुखुम्बु । खोटाङको रैथाने बाली कोदोले व्यावसायिक बिस्कुटको रूप पाएको छ । ‘प्रथम राष्ट्रिय कोदो दिवस–२०८२’ को अवसर पारेर शुभम् फाउण्डेशनले स्थानीय सरकारको सहकार्यमा ‘दिक्तेल कोदो बिस्कुट’ को व्यावसायिक उत्पादन तथा बजारीकरण सुरु गरेको हो ।

फाउण्डेशनका कार्यकारी निर्देशक सूर्य राईका अनुसार दिक्तेल रुपाकोट मझुवागढी नगरपालिकाले उपलब्ध गराएको ५० प्रतिशत अनुदानको यन्त्रबाट बिस्कुट उत्पादन थालिएको हो । कोदोको पिठो, घ्यू, दूध र चिनी मिसाएर बनाइएको सय ग्राम तौलको बिस्कुटको प्याकेटलाई ५० रुपैयाँ मूल्य तोकिएको छ । शनिबार एक कार्यक्रमका बीच जिल्ला समन्वय समिति खोटाङका प्रमुख सनबहादुर राई, प्रमुख जिल्ला अधिकारी कल्पना श्रेष्ठ लगायतले संयुक्त रूपमा बिस्कुट सार्वजनिक गरेसँगै यसको औपचारिक बजारीकरण थालिएको हो ।

फाउण्डेशनले कृषि ज्ञान केन्द्र र दिक्तेल रुपाकोट मझुवागढी नगरपालिकासँगको सहकार्यमा आयोजना गरेको ‘प्रथम राष्ट्रिय कोदो दिवस’ मा बिस्कुटसँगै कोदोबाट निर्मित केक, मःम, कुकिज, सेलरोटी, रक्सी र तोङ्बाजस्ता दर्जनौँ परिकार समेत प्रदर्शनीमा राखिएको थियो ।

कार्यक्रममा अतिथिहरूले कोदोको बिस्कुट स्वादिलो, गुणस्तरीय र स्वास्थ्यकर भएको प्रतिक्रिया दिएका थिए । जिल्ला समन्वय समितिका प्रमुख सनबहादुर राईले स्थानीय उत्पादनको प्रवद्र्धनले युवा पलायन रोक्न र गाउँमै स्वरोजगार सिर्जना गर्न मद्दत पुग्ने विश्वास व्यक्त गर्नुभएको छ ।