स्वास्थ्य उपचारका लागि खुम्बुका पाँच बिरामीलाई तीन लाख सहयोग

साउन १७, सोलुखुम्बु । सोलुखुम्बुको खुम्बु पासाङ्ल्हामु गाउँपालिकाले गम्भीर रोगबाट पीडित पाँच जना बिरामीलाई औषधि उपचार खर्च स्वरूप तीन लाख रुपैयाँ आर्थिक सहायता प्रदान गरेको छ । गाउँपालिकाको वडा नम्बर १ का देउ माया रेग्मी मगर, गरतेम्बा शेर्पा, ल्हाक्पा छम्जी शेर्पा, दाकी शेर्पा र आङ ल्हाक्पा शेर्पाले जनही मासिक पाँच हजार रुपैयाँका दरले वार्षिक ६० हजार, गरी कूल तीन लाख रुपैयाँ प्रदान गरिएको हो । गाउँपालिकाका प्रमुख प्रशासकीय अधिकृत नवराज गौतमले आर्थिक वर्ष २०८१/८२ मा कार्यविधिअनुसार छनोट गरिएका बिरामीहरूलाई उपचार खर्च प्रदान गरिएको जानकारी दिनुभयो ।

यस्तै स्वास्थ्य शाखा प्रमुख अर्थिमाया तामाङका अनुसार, आर्थिक सहायता स्वास्थ्य तथा जनसङ्ख्या मन्त्रालय, काठमाडौँद्वारा जारी “मृगौला प्रत्यारोपण, डायलासिस, क्यान्सर रोग तथा मेरुदण्ड पक्षघात भएका बिरामीलाई औषधि उपचार खर्च उपलब्ध गराउने कार्यविधि २०७८ अन्तर्गत उपलब्ध गराइएको हो । गाउँपालिकाले गम्भीर रोगका कारण आर्थिक भार व्यहोर्नु परेका स्थानीयलाई राहत दिने उद्देश्यले यो कार्यक्रम सञ्चालन गर्दै आएको छ ।