नेचासल्यानका १९ ले लिए आलु चिप्स बनाउने तालिम, किसानहरू उद्यमी बन्न सक्ने उपाध्यक्ष राईकाे भनाई

जेठ १९, सोलुखुम्बु । नेचासल्यान गाउँपालिकाकी उपाध्यक्ष विना राईले किसानहरू उद्यमी बन्न सक्ने  बताउनु भएको छ । आज ५ दिने आलु चिप्स एवं आलुका परिकार बनाउने तालिमको समापन कार्यक्रममा बोल्दै उहाँले आलु जन्य परिकार बनाएर त्यसबाट नेचासल्यानका किसानले आर्थिक समृद्धि हासिल गर्ने भन्दै यस्तो बताउनुभएको हो । गत जेठ १५ गतेबाट गाउँपालिकामा गरिबी निवारणका लागी लघु उद्यम विकास कार्यक्रम मेड्पा अन्तर्गत सञ्चालित आलु चिप्स उत्पादन सम्बन्धी सीपमुलक तालिमका १९ सहभागीहरूले अव आफ्नै तवरबाट उत्पादन दिन सक्ने आधारमा उपाध्यक्ष राईले यस्तो बताउनुभएको हो ।

गाउँपालिकाको आर्थिक सहयोग र ग्रामीण क्षेत्र विकास विकास प्रालिको आयोजनामा सम्पन्न तालिम आज बाट समापन भएको छ ।  तालिममा सहभागीले सिकेको सीपलाई परोक्ष रुपमा किसानले व्यवसायिकतातिर जोड्न सक्ने उपाध्यक्ष राईको भनाई छ । आलु उत्पादनका पृथक सम्भावना बोकेको सोलुखुम्बुमा गाउँपालिकाले आयोजना गरेको यो तालिम महत्वको तालिमको रुपमा हेरिएको गाउँपालिकाले जनाएको छ । समापन कार्यक्रमका क्रममा गाउँपालिकाको वडा नम्बर १ का अध्यक्ष रमेश कुमार राईले सीपमुलक तालिम पालिकाहरूलाई आवश्यक रहेको भन्दै तालिमलाई व्यवसायमा परिणत गर्न अनुरोध गर्नुभएको छ ।