सामाजिक सहकार्यमा हरियालीको बीउः अरुण गाउँपालिका – ७ मा वृक्षरोपण अभियान

साउन १९, सोलुखुम्बु । भोजपुरको अरुण गाउँपालिका वडा नम्बर ७, सिक्रेटार क्षेत्र वातावरणीय संरक्षण र सामाजिक सहकार्यको उदाहरण बन्न थालेको छ । वडाको नेतृत्वमा सुरु गरिएको वृक्षरोपण अभियानले स्थानीय तहमा जनसहभागिता र सामुदायिक चेतनालाई नयाँ उचाइ दिएको छ । वडाध्यक्ष कुमार थापाको अगुवाइमा वडा कार्यालय परिसरदेखि विद्यालय, स्वास्थ्य संस्था, सार्वजनिक स्थलसम्म विभिन्न जातका बिरुवाहरू रोपिएको छ ।

अभियानमा डिभिजन वन कार्यालय भोजपुर र सबडिभिजन वन कार्यालय मोरङको प्राविधिक तथा वनस्पतिक सहयोग उल्लेखनीय देखिएको छ। यी निकायहरूबाट बिरुवाहरू उपलब्ध गराइएको हो । तर यो अभियान केवल बिरुवा रोप्ने कार्यक्रम होइन, यो अभियान जनसहभागिताबाट हुने सामाजिक रुपान्तरणको एक संकेत हो । समाजसेवी, शिक्षक, विद्यार्थी, राजनीतिक प्रतिनिधि र वडा सदस्यहरू समेत सहभागी रहेको यस कार्यक्रममा सबैले वातावरणप्रति उत्तरदायित्व बोक्नुपर्ने सन्देश दिएका छन् ।

“यो अभियान हाम्रो वडा मात्र होइन, भविष्यका पुस्ताका लागि सन्देश हो,” वडाध्यक्ष थापाले भन्नुभयो, “हरेक नागरिकको सहभागिता विना दीगो विकास सम्भव छैन ।” योजना अनुसार वृक्षरोपण कार्यलाई निरन्तरता दिइने जनाइएको छ ।