दूधकुण्ड मेलामा रेडक्रसले स्वास्थ्य उपचार शिविर आयोजना गर्दै 

साउन १९, सोलुखुम्बु । जनैपूर्णिमाको अवसरमा प्रसिद्ध पर्यटकीय स्थल दुधकुण्डमा लाग्ने मेलाको तयारी विभिन्न कोणबाट अगाडि बढेको छ । तीर्थयात्रीहरूको सुविधा, स्वास्थ्य सेवा र सुरक्षाका लागी आयोजकले विभिन्न सङ्घसंस्था र स्वयंसेवकसँगको समन्वयलाई निरन्तरता दिँदै तयारी अगाडि बढाएको हो । यसैक्रममा नेपाल रेडक्रस सोसाइटी जिल्ला शाखा सोलुखुम्बुले ४ दिन दूधकुण्ड मेलामा प्राथमिक स्वास्थ्य उपचार शिविर सञ्चालन गर्ने भएको छ ।  

विगत वर्षहरूमै यस वर्षपनि रेडक्रसले जनैपूर्णिमाको अवसर पारेर लाग्ने दूधकुण्ड मेलामा तीर्थयात्रीहरूको स्वास्थ्यलाई ख्याल गर्दै उपचार शिविरको आयोजना गर्ने भएको हो ।  संस्थाले २१ गते देखी २४ गते सम्म उपचार शिविरको आयोजना गर्न लागिएको रेडक्रस सोसाइटी जिल्ला शाखा सोलुखुम्बुका कोषाध्यक्ष सुरेश खड्काले बताउनुभयो ।  रेडक्रसले ३ जना अनुभवी स्वास्थ्यकर्मीहरू सहित १२ जनाका स्वयंसेवकको टोली  फिल्डमा खटिएर सेवा दिने छ ।

टोलीले दूधकुण्ड पुग्ने बाटोको विभिन्न ३ ठाउँमा सहश्रबेनी, कामीडाँडा र दूधकुण्ड ३ ठाउँमा दर्शनसँगसँगै रहेर आपतकालीन अवस्थामा उपचार सेवा दिन  तयार रहने जनाइएको छ ।  उच्च हिमाली क्षेत्रमा मेला लाग्ने भएकाले जाने तिर्थयात्रीहरुमा विभिन्न स्वास्थ्य समस्या देखिन सक्ने भएकाले शिविरको आयोजना गर्न लागिएको जनाइएको छ ।