दूधकुण्ड मेला भर्न गएका ७ सयको स्वास्थ्य परिक्षण, ५ जनाको उपचार 

साउन २५, सोलुखुम्बु । नेपाल रेडक्रस सोसाइटी जिल्ला शाखा सोलुखुम्बुले करिव ७ सय बढी दर्शनार्थीहरूको स्वास्थ्य परिक्षण गरेको छ ।  जनै पूर्णिमाको अवसरमा दूधकुण्ड पोखरीमा लाग्ने मेलाको अवसरमा रेडक्रसले ७ सय बढी दर्शनार्थीको स्वास्थ्य परिक्षण गरि सेवा दिएको हो  । समुन्द्री सतहबाट ४६ सय मिटरको उचाइमा हरेक वर्ष जनैपूर्णिमाको दिन लाग्ने मेलाको अवसरमा त्यहाँ पुग्ने तीर्थयात्रीहरूलाई हरेक वर्ष रेडक्रसले उपचार सेवा दिँदै आएको छ ।

 नेपाल लाइफ इन्स्योरेन्सको सहयोग तथा रेडक्रस सोसाइटी जिल्ला शाखा सोलुखुम्बुको आयोजनामा नेपाली सेना सहितको टोलीले साउन २३ र २४ गते २ दिन दुधकुण्ड जाने विभिन्न ठाउँमा गएर यात्रीहरूलाई सेवा दिएको नेपाल रेडक्रस सोसाइटी जिल्ला शाखा सोलुखुम्बुका कोषाध्यक्ष सुरेश खड्काले बताउनुभयो ।  उचाइका कारण हुने विभिन्न समस्याका लागी संस्थाले १२ जना स्वयंसेवक तथा डाक्टरहरूको टोलीलाई विभिन्न ठाउँमा तैनाथ राखेर सेवा दिएको उहाँको भनाई छ ।  

कामुडाँडा, जम्लयाहा खोला, गाम्टाङ, सहश्रबेनी, दुधकुण्ड लगायतका ठाउँमा बसेर स्वास्थ्य परिक्षण तथा उपचार गरिएको हो ।  करिव ७ सयको स्वास्थ्य परिक्षणका क्रममा ५ जना बिरामीको उपचार गरिएको छ ।  यसवर्षको जनैपूर्णिमाको अवसरमा ३ हजार करिव भक्तजनले दूधकुण्ड दर्शन गरेको जनाइएको छ ।