महाकुलुङका ११ सय बढीले लिए काठमाण्डौ केन्द्रित शिविरबाटै सेवा 

साउन २५, सोलुखुम्बु । सोलुखुम्बुको महाकुलुङ गाउँपालिकाले काठमाण्डौमा आयोजना गरेको एकीकृत सेवा शिविरबाट ११ सय बढी पालिकाबासीले सेवा लिएका छन् । गाउँपालिकाले काठमाण्डौमा रहेका आफ्ना सेवाग्राहीको हितका लागी आयोजना गरेको ३ दिने सेवा शिविरबाट १ हजार १ सय ४२ जनाले सेवा लिएका हुन । गत साउन २२ देखी २४ गते सम्म आयोजित शिविरमा गाउँपालिकाका ५ वटा वडाका नागरिकले विभिन्न १० खाले प्रशासनीक सेवा काठमाण्डौबाटै लिएका छन् ।  

काठमाण्डौमा आयोजित शिविरमा वडा नम्बर १ का १ सय ३५ जनाले, वडा नम्बर २ का ६५ जनाले, वडा नम्बर ३ का १ सय ४४, वडा नम्बर ४ का ७२ जनाले, वडा नम्बर ५ का ३ सय ९६ जनाले लिएका छन् भने  पालिकाबाट गर्नुपर्नेकाम सम्बन्धी सेवाहरु ३ सय ३० जनाले सेवा लिएका छन् ।  गाउँपालिकाले आयोजना गरेको शिविरमा सबैभन्दा धेरै सेवा डिम्याट खाता पहिचान सम्बन्धी प्रवाह गरिएको छ ।

 उक्त सेवा वडा नम्बर ५ का ३ सय जनाले काठमाण्डौबाटै लिएका छन् भने अन्य सेवाहरू मालपोत तिरो कर भुक्तान १ सय ५५ जनाले, सामाजिक सुरक्षा भत्ता नवीकरण १ सय ३८ जनाले, नागरिकता प्रमाणपत्रको सिफारिस तथा प्रतिलिपिको सिफारिस ४२ जनाले, पञ्जिकरण सम्बन्धी  १ सय २१ जनाले, अन्य सिफारिस ३० जनाले, नाता प्रमाणित ३ जनाले, स्वास्थ्य बिमा नवीकरण तथा दर्ता ९ जनाले, राष्ट्रिय परिचयपत्र वितरण सम्बन्धी सेवा ३ सय ३० जनाले लिएका छन्  ।