सोलुदुधकुण्ड–११ मा २६० नागरिकलाई राष्ट्रिय परिचयपत्र वितरण

साउन २६, सोलुखुम्बु । सोलुखुम्बुको सोलुदुधकुण्ड नगरपालिका–११ मा राष्ट्रिय परिचयपत्र वितरण गरिएको छ । वडाबासीको पहिचान सुनिश्चित गर्ने उद्देश्यले २६० जना नागरिकलाई राष्ट्रिय परिचयपत्र वितरण गरिएको हो । नगरपालिकाको प्राविधिक सहयोग तथा वडा कार्यालयको आयोजनामा राष्ट्रिय परिचयपत्र वितरण गरिएको वडा अध्यक्ष टंक बहादुर कार्कीले बताउनुभयो । राष्ट्रिय परिचयपत्रले नागरिकलाई सरकारी सेवा–सुविधा प्राप्त गर्न सहज बनाउने वडा अध्यक्ष कार्कीको भनाई छ ।

आईतबार सम्पन्न कार्यक्रममा नगरपालिकाकी उपमेयर गान्धि माया तामाङ, वडा सदस्यहरू तथा कार्यालयका कर्मचारीहरूको समेत उपस्थिति रहेको थियो । कार्यक्रममा सहभागी सबैलाई वडाध्यक्ष कार्कीले धन्यवाद ज्ञापन गर्दै आगामी दिनमा पनि यस्ता सेवामूलक कार्यक्रमलाई निरन्तरता दिने प्रतिबद्धता व्यक्त गर्नुभएको छ । स्थानीय तहको समन्वयमा सञ्चालन गरिएको परिचयपत्र वितरण कार्यक्रमप्रति स्थानीय नागरिकहरूले सन्तोष व्यक्त गरेका छन् ।