माप्यका १२ सय बढी नागरिकले लिए काठमाण्डौबाटै सेवा

साउन २८, सोलुखुम्बु । माप्य दुधकोशी गाउँपालिकाका १२ सय बढी पालिकाबासीले काठमाण्डौबाटै सेवा लिएका छन् ।  गाउँपालिकाले काठमाण्डौमा आयोजना गरेको २ दिने सेवा शिविरबाट  १ हजार २ सय २६ नागरिकले सेवा लिएका हुन ।  बर्षायामाको समयमा सामान्य सेवा लिन काठमाण्डौबाट गाउँपालिका वा वडा आउनुपर्ने अवस्थालाई हेरेर गाउँपालिकाले काठमाण्डौमा आयोजना गरेको शिविर प्रभावकारी भएको गाउँपालिकाले जनाएको छ ।  

जन्म मृत्यु, विवाह, बसाइसराइ, जस्ता पञ्जिकरणका सेवाहरू तथा अन्य प्रशासनिक कामहरू गर्न पालिकाबासीलाई सहजहाेस भन्नाका लागी गाउँपालिकाले काठमाण्डौमै शिविरको आयोजना गरेको गाउँपालिका अध्यक्ष बुद्धिकिरण राईले बताउनुभयो  ।  शिविरबाट ४८ जनाले विवाह दर्ता, ५६ जनाले जन्म दर्ता, ३८ जनाले मृत्यु दर्ता, १३ जनाले बसाईसराई र ६ जनाले सम्बन्ध विच्छेद सेवा लिएका छन् । शिविरबाट २४२ जनाले सामाजिक सुरक्षा भत्ता नवीकरण गराएको पालिका प्रवक्ता तथा माप्य दुधकोशी ३ का वडाध्यक्ष अमित राईले बताए । त्यस्तै, ३११ जनाको राष्ट्रिय परिचयपत्र वितरण गरिएको छ भने १०८ जनाले भूमिकर सेवा र ४०४ जनाले विभिन्न सिफारिस सेवा लिएका छन् ।

शिविरबाट ३ लाख ५ हजार ८३० रुपैयाँ राजस्व सङ्कलन भएको गाउँपालिकाका निमित्त प्रमुख प्रशासकीय अधिकृत गजेन्द्र भट्टराइले बताउनुभयाे । गाउँपालिका अध्यक्ष राईले आउने वर्षहरुमा पनि शिविरको रुपमा गाउँपालिका केही दिन काठमाण्डौमा ल्याइने उल्लेख गर्नुभयो । सामाजिक सुरक्षा भत्ता नविकरणकै लागि पनि सयौँ नागरिक गाउँ नै पुग्नुपर्ने बाध्यताले कम्तीमा एक जना व्यक्तिको २० देखि २५ हजार खर्च र समयको बचत भएको पालिका उपाध्यक्ष गौरव राईले बताए । लामो समय देखी मालपोत भुमिकर तिर्न नपाएका पालिकाबासीले काठमाण्डौबाट मालपोत भूमिकर तिर्न पाएकोमा खुसी व्यक्त गरेका छन् ।