ओखलढुंगामा बौद्धिक अपांगता भएकी महिलामाथि बलात्कार : दुई जना पक्राउ

साउन ३०, सोलुखुम्बु । ओखलढुंगाको बिगुटारमा बौद्धिक अपांगता भएकी महिलामाथि बलात्कार गरेको आरोपमा दुई जना पुरुष पक्राउ परेका छन् । पक्राउ पर्नेमा सिद्दिचरण नगरपालिका–७ का ४५ वर्षीय ङिमा शेर्पा र २९ वर्षीय लाक्पा रिन्जी शेर्पा रहेका छन् । जिल्ला प्रहरी कार्यालय ओखलढुंगाका सूचना अधिकारी एवं प्रहरी निरीक्षक विजय कार्कीका अनुसार, २०७८ साल चैत्र ११ गते ङिमा शेर्पाले पीडित महिलालाई फन्दपुर देवीस्थान नजिकको जंगलमा लगेर जबरजस्ती करणी गरेका थिए ।

त्यसैगरी, लाक्पा रिन्जी शेर्पाले २०७८ साल साउन ४ गते आफ्नै घरको कोठामा लगेर पीडितमाथि बलात्कार गरेको आरोप छ । दुवै घटनाको उजुरीका आधारमा प्रहरीले साउन २८ गते उनीहरूलाई नियन्त्रणमा लिएको हो । हाल ओखलढुंगा जिल्ला अदालतबाट सात दिनको म्याद थप अनुमति लिएर आवश्यक अनुसन्धान भइरहेको प्रहरीले जनाएको छ । प्रहरीका अनुसार पीडित महिलाको अवस्था विशेष ध्यानमा राखी अनुसन्धानको प्रक्रिया गोप्य र संवेदनशील ढंगले अघि बढाइएको छ ।