कक्षा १२ को परीक्षामा सिंहकाली माविका शतप्रतिशत विद्यार्थी उत्तीर्ण

साउन ३०, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ तिङ्लामा रहेको सिंहकाली माध्यमिक विद्यालय कक्षा १२ को परीक्षामा शतप्रतिशत विद्यार्थी पास गराउन सफल भएको छ । परीक्षामा सामेल भएका सम्पूर्ण २८ विद्यार्थी नै पास भएको विद्यालयले जनाएको छ । वि.सं. २०६५ सालदेखि कक्षा ११ र १२ सञ्चालनमा ल्याएको यस विद्यालयले ग्रामीण भेगबाट समेत गुणस्तरीय शिक्षामा पहुँच पुर्याउँदै आएको छ ।

विद्यालयका सिंहकाली माध्यमिक विद्यालयका प्रधानाध्यापक राममणि ढुङ्गानाले विद्यालयको यो सफलता शिक्षक, अभिभावक, विद्यार्थी र सम्पूर्ण स्थानीय समुदायको निरन्तर सहयोगको परिणाम भएको बताउनुभयो । नियमित पठनपाठन, अतिरिक्त कक्षा, परामर्श कार्यक्रम तथा विद्यार्थी केन्द्रित शिक्षण पद्धतिलाई प्राथमिकता दिएको भन्दै यस पटकको नतिजा उत्साहजनक आएको विद्यालयका शिक्षक नानीकाजी खड्काको भनाई छ ।

उहाँका अनुसार विद्यालयले आगामी दिनमा अझ उत्कृष्ट नतिजा ल्याउने उद्देश्यका साथ शिक्षण गुणस्तरलाई थप प्रभावकारी बनाउने योजना बनाएको छ । विद्यालयको यो सफलताले दुर्गम क्षेत्रका सरकारी विद्यालयहरू पनि उच्च शैक्षिक उपलब्धि हासिल गर्न सक्छन् भन्ने उदाहरण प्रस्तुत गरेको छ ।