सगरमाथामा चाप घटाउन सरकारको नयाँ कदम : ९७ हिमालको आरोहण दुई वर्षका लागि निःशुल्क

साउन ३०, सोलुखुम्बु । सरकारले सगरमाथाको चाप घटाउने र अरु हिमालमा पनि पर्यटन प्रबद्र्धन गर्ने उद्देश्यसहित ९७ वटा हिमालको आरोहण निशुल्क गरेको छ । मन्त्रिपरिषद् बैठकले निर्णय गरेर ९७ वटा हिमाल आरोहणमा दुई वर्षका लागि शुल्क मिनाहा गरेको पर्यटन विभागका निर्देशक हिमाल गौतमले जानकारी दिनुभयो ।

नेपालमा धेरै हिमालहरु उत्तिकै आकर्षक भए पनि सगरमाथामा भीड बढिरहेकाले यस्तो व्यवस्था गरेको उहाँको भनाइ छ । शुल्क छुट भएका हिमालहरू कर्णाली र सुदूरपश्चिम प्रदेशमा रहेका छन् । पाँच हजार नौ सय ७० मिटरदेखि ७ हजार एक सय ३२ मिटरसम्म उचाइ रहेको ति हिमालमा गएको दुई वर्षमा यी ९७ वटा हिमालमा ६८ जना मात्र आरोही गएका छन् । तर सगरमाथामा गएको बसन्त याममा मात्रै चार सय ५६ जनाले अनुमती लिएका थिए । नेपालले गएको वर्ष पर्वतारोहण शुल्कबाट झन्डै ९२ करोड रुपैयाँ आम्दानी गरेको छ ।

नेपालमा चार सय ६१ वटा हिमाल आरोहणका लागि खुल्ला गरेकोमा रोयल्टी सङ्कलन गर्न सगरमाथाको योगदान तीन चौथाई भन्दा बढी छ । सगरमाथाको भीडभाड र वातावरणीय चिन्ताका कारण सर्वोच्च अदालतले पनि आरोहण अनुमतिपत्रमा सीमा तोक्न आदेश दिएको छ । यसैबीच सरकारले सेप्टेम्बरदेखि लागू हुने गरी सगरमाथा आरोहणको शुल्क ११ हजार डलरबाट बढाएर १५ हजार डलर पुर्याएको छ ।