खुम्बुमा जर्सी गाई पालनका लागी अनुदान दिँदै गाउँपालिका 

भदौ १, सोलुखुम्बु । सोलुखुम्बुको खुम्बु पासाङल्हामु गाउँपालिकाले अनुदानमा जर्सी गाईका बाछी बाँड्ने भएको छ । गाउँपालिकाले वडा नम्बर १, २ र ३ का इच्छुक कृषकहरूलाई ५० प्रतिशत अनुदानमा जर्सी गाईका बाछी वितरण गर्ने भएको हो । प्रमुख प्रशासकीय अधिकृत नवराज गौतमले एक सूचना जारी गर्दै किसानहरूलाई माग गर्न आग्रह गर्नुभएको हो । आर्थिक वर्ष २०८२/८३ को वार्षिक स्वीकृत कार्यक्रम अनुसार गाउँपालिकाको कृषि शाखाले सञ्चालन गर्ने गरि कार्यक्रम गर्न लागिएको हो । कृषि फर्म पशु धनी तथा इच्छुक कृषकहरूले आवश्यक कागजात संलग्न राखी निवदेन दिन पनि गाउँपालिकाले आग्रह गरेको छ ।  हिमाली क्षेत्रमा विशेष गरि चौँरी पालन व्यवसाय गर्न सकिने भएपनि पछिल्लो समय चौँरी पालन व्यवसाय दिनानुदिन घट्दै गएको छ । गाउँपालिकाले चौँरी पालन व्यवसायलाई प्रोत्साहन गर्नुको सट्टा जर्सी गाई पालन तर्फ ध्यान दिइरहेको हो ।