थर्पुडाँडा माविमा जन्म दिनको अवसरमा शैक्षिक सहायता तथा स्टेशनरी वितरण

भदौ २, सोलुखुम्बु । खोटाङको केपिलासगढी गाउँपालिका–५ मा अवस्थित थर्पुडाँडा माध्यमिक विद्यालयमा जन्म दिनको अवसरलाई शैक्षिक कार्यमा रूपान्तरण गर्दै आएको छ । विद्यालयले प्रत्येक बिहानको एसेम्ब्लीमा शिक्षक तथा विद्यार्थीको जन्म दिन विशेष रूपमा मनाउने प्रचलन स्थापना गरेको छ । यस कार्यक्रमअन्तर्गत जन्म दिन परेको शिक्षक तथा विद्यार्थीले स्वेच्छिक रूपमा शैक्षिक उन्नयन कोषमा १०० रुपैयाँ वा सोभन्दा बढी रकम योगदान गर्ने गर्छन् ।

संकलित रकमबाट प्रत्येक ६÷६ महिनामा विद्यालयलाई आवश्यक शैक्षिक सामग्री तथा सहायता प्रदान गरिँदै आएको छ । यसैक्रममा, विद्यालयका शिक्षक दिनेस खनालले आफ्नो जन्म दिनको अवसरमा कक्षा बाल विकास केन्द्रदेखि कक्षा ३ सम्म अध्ययनरत विद्यार्थीहरूलाई स्टेशनरीका सामग्री वितरण गर्नुभएको छ । उक्त कार्यक्रममा कलम, पेन्सिल लगायतका सामग्रीहरू वितरण गरिएको विद्यालयका प्रध्यानाध्यपक ज्ञानु राईले जानकारी दिनुभयो ।

शिक्षक खनालले जन्म दिनलाई सामाजिक उत्तरदायित्वसँग जोड्न पाउँदा खुशी व्यक्त गर्दै यस्ता कार्यहरूले विद्यार्थीमा सहकार्य र सेवा भावनाको विकास हुने विश्वास व्यक्त गर्नुभयो । विद्यालय प्रशासनले समेत उक्त कार्यको सराहना गर्दै आगामी दिनमा यस्ता कार्यक्रमलाई अझ व्यवस्थित र प्रेरणादायी बनाउने बताएको छ । विद्यालयको यो उदाहरणीय अभ्यासले जन्म दिनजस्ता व्यक्तिगत अवसरलाई समुदायमुखी बनाउँदै शैक्षिक विकासमा सकारात्मक प्रभाव पार्दै आएको छ ।