भृकुटीमण्डपमा नाडा अटो शो आजदेखि शुरु हुँदै, उड्ने कार सहित विभिन्न गाडीहरुको प्रदर्शन

भदौ ३, सोलुखुम्बु । अटोमोवाइल्स एशोसिएशन अफ नेपाल (नाडा) अटो शो आजदेखि काठमाण्डौको भृकुटीमण्डमा शुरु हुँदैछ । प्रदशर्नी आउँदो आइतवारसम्म चल्ने र हरेक दिन बिहान साढे १० बजेदेखि बेलुका ७ बजेसम्म अवलोकन गर्न मिल्ने नाडाले जनाएको छ । मेलामा ७५ वटा कम्पनी तथा संस्थाका स्टल रहने छन् ।

जसमा चारपाङ्ग्रे गाडी, मोटरसाइकल÷स्कुटर, हलुका व्यवसायिक गाडी, बीमा कम्पनी, लुब्रिकेन्ट्स, टायर कम्पनी तथा अटोसँग सम्बन्धित विभिन्न उत्पादनको प्रदर्शनी रहने छ । यसपटकको प्रदर्शनीमा उड्ने कारसमेत राखिने नाडाले जनाएको छ । व्यावसायिक गाडी प्रदायक कम्पनी एमएडब्लू वृद्धिले चिनियाँ कार निर्माता चाङ्गान अटोसँगको सहकार्यमा उड्ने कार ल्याएर प्रदर्शनीमा राख्न लागेको हो ।

यसले नेपालमा हवाई र स्थलीय यातायातको भविष्यलाई नयाँ आयाम दिने कम्पनीले जनाएको छ । प्रदर्शनीमा रोबोटहरु पनि राखिने र यसले आगन्तुकहरूसँग प्रत्यक्ष संवाद गर्ने नाडाले जनाएको छ ।