खुम्बुमा विभिन्न ४ खाले सीपमूलक तालिम सञ्चालन हुँदै

भदौ ३, सोलुखुम्बु ।  खुम्बु पासाङल्हामु गाउँपालिका सोलुखुम्बुमा विभिन्न ४ प्रकारका सीपमूलक तालीम सञ्चालन हुने भएको छ । गाउँपालिकाको समन्वय तथा पोखरा भ्याली प्राविधिक ट्रेनिङ इन्स्टिच्युटको आयाेजनामा गाउँपालिकामा सीपमुलक तालिम सञ्चालन हुने भएको हो ।  बेरोजगार युवाहरूलाई सीप प्रदान गरि स्वदेश वा विदेशमा रोजगारीको अवसरमा लागी इन्स्टिच्युटले विभिन्न दातृ निकायको सहयोगमा तालिम सञ्चालन गर्ने भएको जनाइएको छ ।

गाउँपालिका भित्रका १७ देखी ४० वर्ष भित्रका २४ जना युवाहरूलाई ४ महिने  सिकर्मी तथा सटरिङ सम्बन्धी तालिम १० जनालाई, डकर्मी तथा स्टिल फिक्चर १० जनालाई, इलेक्ट्रोनिक तथा मोबाइल मर्मत सम्बन्धी तालिम २ जनालाई र ६ महिने बेसिक र एडभान्स इलेक्ट्रिकल तालिम २ जनालाई उपलब्ध गराइने भएको तालिम व्यवस्थापक विष्णु प्रसाद लामिछानेले बताउनुभयो ।  पूर्ण रुपमा निशुल्क प्रदान गरिने तालिममा सहभागी हुनेहरूलाई तालिम अवधिभर खाना तथा बस्न समेत निशुल्क गरिएको छ ।  यस्तै तालिम लिनेहरूलाई मासिक १० हजारका दरले निर्वाह भत्ता समेत प्रदान गरिने जनाइएको छ ।  तालिम आगामी कार्तिक ११ गते देखी सञ्चालन हुने इन्स्टिच्युटले जनाएको छ ।