रावा बेसीले इटहरी र काठमाण्डौमा एकीकृत सेवा शिविर लाँदै, आधारभूत प्रशासनिक सेवा लिन पालिकावासीलाई आह्वान 

भदौ ३, सोलुखुम्बु  । खोटाङको रावा वेसी गाउँपालिकाले काठमाण्डौ र इटहरीमा भएका पालिकावासीलाई काठमाण्डौमै सेवा दिने भएको छ । गाउँपालिका स्थायी बसोबास भई काठमाण्डौ तथा पूर्वी सहर इटहरी लगायत आसपासमा रहँदै आएका पालिकावासीकोलागी गाउँपालिकाले आधारभूत प्रशासनिक सेवा उपलब्ध गराउने गरी कार्यक्रम तय गरेको हो ।  काठमाण्डौ केन्द्रित शिविर आगामी भदौ ५ र ६ गते २ दिन काठमाण्डौको चाबहिलमा आयोजना गर्ने भएको हो भने इटहरी केन्द्रित शिविर भदौ १५ र १६ गते २ दिन इटहरी उपमहानगरपालिकाका सभाहलमा आयोजना हुने जनाइएको छ ।

 बर्सातको कारण सडक मार्फत आवतजावतमा समस्या हुने र नागरिकले सामान्य कामका लागी २० औँ हजार खर्च गर्नुपर्ने बाध्यतालाई हेरेर गाउँपालिका आफै नागरिकका बसोबासस्थल सम्म पुग्न लागेको गाउँपालिकाका अध्यक्ष फटिक कुमार श्रेष्ठले बताउनुभयो ।  शिविर मार्फत गाउँपालिकाले राष्ट्रिय परिचयपत्र वितरण, सामाजिक सुरक्षा भत्ता नवीकरण, पञ्जिकरण सम्बन्धी सेवाहरू, वडा कार्यालयबाट गरिने सिफारिस सम्बन्धी सेवाहरू प्रदान गरिने गाउँपालिकाका प्रमुख प्रशासकीय अधिकृत राजेश दाहालले बताउनुभयो । यसअघि जिल्लाको ऐसेलुखर्क गाउँपालिकाले सेवा शिविर काठमाण्डौ र इटहरीमा आयोजना गरेर सेवा दिइसकेको छ ।  

यसैबीच गाउँपालिकाको प्रमुख प्रशासकीय अधिकृतको जिम्मेवारी सहित राजेश दाहाल रावा बेसी गाउँपालिकामा हाजिर हुनुभएको छ ।  यसअघिका प्रमुख प्रशासकीय अधिकृत सरोज रेग्मीको सरुवा भएसँगै संघिय मामिला तथा सामान्य प्रशासन मन्त्रालयले दाहाललाई गाउँपालिकामा खटाएको हो ।  उहाँ केही दिन अघिमात्रै गाउँपालिकामा हाजिर हुनुभएको गाउँपालिकाले जनाएको छ ।