जनजागृति माविले प्रथम त्रैमासिक परीक्षाको नतिजा सार्वजनिक गर्दै उत्कृष्ट विद्यार्थीलाई पुरस्कृत गर्यो

भदौ ३, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ५ मा अवस्थित जनजागृति माध्यमिक विद्यालयले कक्षा ६ देखि १० सम्मको प्रथम त्रैमासिक परीक्षाको नतिजा सार्वजनिक गरेको छ । श्रावण १८ देखि २६ गतेसम्म सञ्चालन भएको परीक्षाको नतिजा सार्वजनिक गरिएको हो ।

विद्यालयका प्रधानाध्यापक महाप्रसाद फुयालको अध्यक्षतामा सम्पन्न उक्त कार्यक्रममा विद्यालय व्यवस्थापन समितिका अध्यक्ष तथा सोलुदुधकुण्ड नगरपालिका वडा नं. ५ का वडाध्यक्ष मिङमार तामाङ प्रमुख अतिथि रहनुभएको थियो ।

कार्यक्रममा कक्षा ६ देखि १० सम्मका प्रत्येक कक्षाका उत्कृष्ट ५ जना विद्यार्थीलाई विद्यालयले उनीहरूले रोजेका स्वैच्छिक उपहार प्रदान गरी सम्मानित गरेको छ । उक्त सम्मानले विद्यार्थीमा अझ उत्साह र प्रतिस्पर्धाको भावना बढाउने विश्वास विद्यालयले व्यक्त गरेको छ ।

कार्यक्रममा सहभागी सबै विद्यार्थीहरूलाई परीक्षाको उपलब्धि विवरण (ग्रेडसिट) वितरण गरिएको विद्यालयले जनाएको छ । विद्यालयले यस्ता कार्यक्रमहरू भविष्यमा पनि निरन्तरता दिने जनाएको छ, जसले शिक्षाको गुणस्तर अभिवृद्धि गर्न थप टेवा पुग्ने विश्वास लिइएको छ ।