इटहरीमा ऐसेलुखर्क गाउँपालिकाको घुम्ती शिविर, १२२ नागरिकले पाए सेवा

भदौ ४, सोलुखुम्बु । खोटाङको ऐसेलुखर्क गाउँपालिकाले इटहरीमा बसोवास गर्दै आएका नागरिकलाई लक्षित गर्दै दुई दिने एकीकृत सेवा शिविर सम्पन्न गरेको छ। शिविर भदौ १ र २ गते इटहरीमा सञ्चालन गरिएको हो।

गाउँपालिकाका अध्यक्ष गिरेन्द्र राईका अनुसार, काम विशेषले इटहरी बस्दै आएका जेष्ठ नागरिक तथा अपाङ्गता भएका व्यक्तिहरूलाई लक्षित गर्दै उनीहरूलाई घरमै सेवा दिने उद्देश्यले शिविर सञ्चालन गरिएको हो। शिविरमा सामाजिक सुरक्षा भत्ता लिने लाभग्राहीहरूको नवीकरण, जन्म, मृत्यु तथा विवाह दर्ता, बसाइँसराई र राष्ट्रिय परिचयपत्रको वितरण सेवा उपलब्ध गराइएको थियो। दुई दिनको उक्त शिविरबाट १२२ जना पालिकाबासी लाभान्वित भएका छन्।

सामाजिक सुरक्षा भत्ता वितरण कार्यविधि, २०७७ को दफा ९४० अनुसार लाभग्राहीहरूको अनिवार्य बायोमेट्रिक भेरिफिकेशन आवश्यक भएकाले इटहरी र काठमाडौँमा शिविर आयोजना गरिएको गाउँपालिकाले जनाएको छ।

भदौ मसान्तभित्र सबै लाभग्राहीको विवरण नवीकरण गर्नुपर्ने भएकाले वर्षात्का कारण गाउँ आउन नसक्ने लाभग्राहीलाई काठमाडौँ र इटहरीमै सेवा दिने व्यवस्था मिलाइएको गाउँपालिकाले जनाएको छ। सात वटा वडा रहेको ऐसेलुखर्क गाउँपालिकामा हाल १,१०६ जना लाभग्राहीले नियमित रूपमा सामाजिक सुरक्षा भत्ता लिँदै आएका छन्। गाउँपालिका साउन २७ र २८ गते काठमाडौँको चाबाहिल चोेक नजिकबाट समेत सेवा प्रदान गरिसकेको छ ।