सोलुखुम्बुसहित २० जिल्लाका प्रमुख जिल्ला अधिकारीको एकैपटक सरुवा

भदौ ५, सोलुखुम्बु । गृह मन्त्रालयले सोलुखुम्बुसहित देशभरका २० जिल्लामा कार्यरत प्रमुख जिल्ला अधिकारी (प्रजिअ) हरूको एकैपटक सरुवा गरेको छ । हाल सोलुखुम्बुका प्रमुख जिल्ला अधिकारी रहेका अनोज कुमार घिमिरेलाई मन्त्रालय तानिएको छ भने लिला कुमारी के.सी पाण्डेलाई नयाँ प्रजिअको रूपमा सोलुखुम्बु खटाइएको छ ।

उनी हाल गृह मन्त्रालय सिंहदरबारमा उपसचिवका रूपमा कार्यरत थिइन् । बुधबार गृह मन्त्रालयको निर्णयअनुसार काठमाडौँ, ललितपुर, भक्तपुर, ओखलढुंगा, दोलखा, भोजपुर, संखुवासभा, पाल्पा, सप्तरी, धनकुटा, बारा, पर्सा, दाङ, सिरहालगायतका जिल्लाका प्रजिअहरू पनि फेरिएका छन् ।

काठमाडौँ जिल्लामा छविलाल रिजाल, ललितपुरमा सुमन घिमिरे र भक्तपुरमा नवराज घिमिरेलाई प्रजिअको जिम्मेवारी दिइएको छ । गृह मन्त्रालयले २० जना सहसचिव र २४ जना उपसचिवको सरुवा गर्दै विभिन्न जिल्लामा प्रमुख जिल्ला अधिकारीको जिम्मेवारी तोकेको हो । यो सरुवासँगै प्रशासनिक कामकाजमा नयाँ नेतृत्वले भिन्न ढंगले काम गर्ने अपेक्षा गरिएको छ । सरुवा गरिएको प्रजिअहरूलाई चाँडै नै कार्यस्थलमा हाजिर भई जिम्मेवारी सम्हाल्न निर्देशन दिइएको छ ।