अध्यक्ष कार्कीले सामाजिक उत्तरदायित्वबाट भाग्ने अटेरी हाइड्रोलाई टेकाइन घुँडा

भाद्र ५, सोलुखुम्बु । हाइड्रो पावर कम्पनीहरूले सामाजिक उत्तरदायित्वका दायित्वहरूको पालना गर्न अटेर गरेपछि मन्त्रालय सम्म पुगेको सोलुखुम्बुको लिखुपिके गाउँपालिका सफलता नजिक पुगेको छ ।  गाउँपालिकामा एमभि दुगड ग्रुपद्वारा सञ्चालित हाइड्रोपावर कम्पनीहरूले वातावरणीय प्रभाव मूल्याङ्कनमा उल्लेख गरिएका सामाजिक उत्तरदायित्वका दायित्वहरू पालना नगरेको गम्भीर आरोपहरू सहित सुरु भएको सङ्घर्ष अन्तिम निर्णयमा पुगेको हो ।

सेयर निष्कासन, ग्रामीण विद्युतीकरण, रोजगारीको सुनिश्चितता, तथा सार्वजनिक पूर्वाधार विकास जस्ता विषयमा कम्पनीलाई स्थानीय सरकारबीच पटकपटक ताको गरेपनि कम्पनीले अटेर गरेपछी विषय झन जटिल बन्दै गएका थियो । एमभि दुगड गु्रप द्धारा सञ्चालित नुम्बुर हाइड्रोपावर परियोजनाले स्थानीय सेयर बिनानै प्रिमियम दरमा सेयर निष्कासनको प्रयास गर्दै नेपाल धितोपत्र बोर्डमा प्रस्ताव दर्ता गरेपछि लिखुपिके गाउँपालिकाले यसप्रति कडा आपत्ति जनाउँदै बोर्डलाई अनुमति नदिन पत्राचार गरेको थियो । यस्ता र अन्य विभिन्न विषय लिएर गाउँपालिका अध्यक्ष मिना कार्की बस्नेतले सुरु गरेको पहलकदमीमा बुधबार सम्बन्धित निकायले छानविनका लागी समिति बनाउने निर्णय गरेको छ ।

उर्जा, जलस्रोत तथा सिँचाइ मन्त्री माननीय दीपक खड्का, मन्त्रालयमा लिखुपिके गाउँपालिका, विद्युत विकास विभाग, एमभि दुगड ग्रुपका प्रतिनिधि, तथा हाइड्रोपावर सङ्घर्ष समिति बीच छलफल पश्चात छानविन समिति गठन गर्ने निर्णय भएको गाउँपालिका अध्यक्ष बस्नेतले बताउनुभयो ।  समस्याका विषयमा मन्त्रालयमा भएको गहन छलफल पछि मन्त्री खड्काले विद्युत विकास विभागका महानिर्देशकलाई तत्काल उच्चस्तरीय छानबिन समिति गठन गरी स्थलगत अध्ययन र प्रतिवेदनमार्फत समस्या समाधान गर्न स्पष्ट निर्देशन दिएको बताइएको छ ।