ऐसेलुखर्कको एकीकृत सेवा शिविर, ३ सय ५० बढीले लिए सेवा 

भाद्र ५, सोलुखुम्बु । खोटाङको ऐसेलुखर्क गाउँपालिकाले देशका २ ठूला सहरमा आयोजना गरेको शिविरबाट ३ सय ५० बढी पालिकाबासीले सेवा लिएका छन् । गाउँपालिकाले काठमाण्डौमा आयोजना गरेको शिविरबाट २ सय ५३ र इटहरीबाट १ सय २२ गरि जम्मा शिविरबाट ३ सय ७३ पालिकाबासीले सेवा लिएका हुन् ।  वर्षातको समयमा सहरबाट गाउँ आउन नागरिकलाई समस्या हुने अवस्थालाई मध्येनजर गर्दै आयोजना गरिएको शिविरबाट सबैभन्दा बढी सामाजिक सुरक्षा भत्ता प्राप्त गर्ने लाभग्राही लाभान्वित भएका छन् ।

 वृद्धवृद्धा, अपाङ्गता भएका नागरिक, बिरामी तथा अन्य फरक क्षमता भएका पालिका बासीलाई शिविरले प्रशासनिक सेवामा पहुँच पु¥याएको गाउँपालिका अध्यक्ष गिरेन्द्र बाहदुर राईले बताउनुभयो । पालिकाले काठमाण्डौमा साउन २८ र २९ गते २ दिन र इटहरीमा आयोजना गरिएको साउन २ र ३ गते २ दिन शिविर लगिएको सूचना अधिकारी सिजन राईले बताउनुभयो । काठमाण्डौबाट वडा नम्बर १ का २८ जनाले, वडा नम्बर २ का ६० जनाले, वडा नम्बर ४ का ८९ जनाले, वडा नम्बर ५ का ३४ जनाले, वडा नम्बर ६ का २३ जनाले र वडा नम्बर ७ का १९ जनाले सेवा लिएको उहाँको भनाई छ ।  यस्तै इटहरीमा आयोजना गरिएको शिविरबाट १ सय २२ जनाले सेवा लिएका छन् ।

सो मध्ये सामाजिक सुरक्षा भत्ता ८९ जनाले, मृत्यु दर्ता, २ जनाले, जन्मदर्ता ३ जनाले, बसाँइसराई सम्बन्धी सेवा १० जनाले अन्य विभिन्न सिफारिस सम्बन्धी सेवा १९ जनाले लिएका छन् ।  शिविरबाट करिव ३६ हजार रुपैयाँ राजस्व सङ्कलन भएको पनि जनाइएको छ ।