भाद्र ५, सोलुखुम्बु । हाइड्रो पावर कम्पनीले नागरिक तथा सामाजिक उत्तरदायित्वका कामहरू नगरेको भन्दै लिखुपिके गाउँपालिका अध्यक्ष मिना कार्की बस्नेतले धितोपत्र बोर्डलाई प्रिमियम शेयर निस्कासन नगर्न पत्राचार गर्नुभएको छ । विहीबार गाउँपालिका अध्यक्ष कार्कीले विभिन्न १० कारण उल्लेख गर्दै गाउँपालिका भित्र सञ्चालित नुम्बुर हाइड्रोपावर कम्पनीलाई प्रिमियम शेयर निस्कासन गर्ने अनुमति नदिन भन्दै अध्यक्ष कार्कीले धितोपत्र बोर्डलाई पत्राचार गर्नुभएको हो ।
कम्पनीले धितोपत्र बोर्डमा प्रिमियम शेयर निश्कासनका लागी निवेदन दिएको भन्दै उहाँले कम्पनीले स्थानीय सरोकारवालासँग दायित्व पुरा नगरेको, कम्पनीमा प्राविधिक तथा कानूनी समस्या रहेको भन्दै शेयर निष्कासनमा रोक लगाउन अनुरोध गर्नुभएको हो ।
उहाँले लेखेको पत्रमा विभिन्न १० कारण उल्लेख छन जसमध्ये महालेखा परीक्षकको कार्यालयले बेरुजु देखाएको, इआइएमा उल्लेखित सामाजिक उत्तरदायित्व पुरा नगरेको, डिपिआर अनुसार काम नगरेको, स्थानीयतहसँग समन्वय नगरेको, स्थानीय पूर्वाधार विकासमा काम नगरेको, राजस्व तथा कर सम्बन्धी अनियमितता गरेको, आयोजनाको लागत संरचना अस्पष्ट रहेको, समुदायमा वातावरणीय असर पु¥याएको, स्थानीय श्रोतमा प्रत्यक्ष असर पु¥याएको र पूर्ण स्वीकृति र अनुमतिको उल्लङ्घन गरेको जस्ता प्रमुख कारण छन् ।
उहाँले पत्रमार्फत हाइड्रोले गरेको अनियमितता तथा अन्याय विरुद्ध लामो समयदेखि नागरिक आन्दोलित भएपनि सुनवाई नभएकाले हाल उपल्लो निकायले नै छानविन समिति बनाएर काम गर्नै तयारी भइरहेकाले पनी अहिले उक्त कम्पनीलाई स्वीकृति दिनु स्थानीय नागरिकको भावनालाई लात हान्नु जस्तै भएको समेत दावी गर्नुभएको छ ।
Discussion about this post