सोलुखुम्बुमा ३० हजार बढी पशुमा खोरेत विरुद्धको खोप, कृत्रिम गर्भाधारण पनि तीव्र

भदौ ६, सोलुखुम्बु । भेटेरीनरी अस्पताल तथा पशु सेवा विज्ञ केन्द्र सोलुखुम्बुले चालु आर्थिक वर्ष २०८१÷८२ मा ३० हजारभन्दा बढी पशुमा खोरेत (एफएमडी) रोगविरुद्धको खोप लगाइएको छ । कार्यालयका अनुसार जिल्लाका आठवटै स्थानीय तहमा गरी कुल ३० हजार १५५ पशुमा खोप लगाइएको हो ।

कार्यालय प्रमुख भिमलाल तामाङका अनुसार जिल्लाको सोलुदुधकुण्ड नगरपालिकामा ५ हजार ३५०, सोताङ र महाकुलुङ गाउँपालिकामा ५–५ हजार, नेचासल्यान गाउँपालिकामा ४ हजार ९१५, लिखुपिकेमा ३ हजार ९८०, थुलुङ दुधकोशीमा ३ हजार, खुम्बु पासाङल्हामुमा १ हजार ९१० तथा माप्यदुधकोशी गाउँपालिकामा १ हजार पशुमा खोरेत विरुद्धको खोप लगाइएको हो । यो खोप अभियान पहिलो चरणमा सञ्चालन गरिएको थियो भने दोस्रो चरणको खोप अभियान भने हालसम्म सञ्चालन नभएको बताइएको छ ।

यसैबीच, केन्द्रले पछिल्लो एक वर्षमा ५१० वटा गाई तथा भैसीलाई कृत्रिम गर्भाधारण सेवा पनि उपलब्ध गराएको छ। तीमध्ये १ जिल्ला स्थित डिस्पेन्सरी र ४ वटा स्थानीय तहमार्फत सेवा प्रदान गरिएको हो । कृत्रिम गर्भाधारण गराइएका पशुमध्ये १२७ स्थानीय गाई, १८६ उन्नत गाई, १४४ स्थानीय भैसी र ५३ उन्नत भैसी रहेको केन्द्रले जनाएको छ । पशु स्वास्थ्य तथा उत्पादन सुधार गर्न खोरेत विरुद्धको खोप तथा कृत्रिम गर्भाधारण कार्यक्रम प्रभावकारी हुने बताउँदै प्रमुख तामाङले पशुपालकहरूलाई अझ सजग र सचेत रहन आग्रह गर्नुभएको छ ।