सिन्धुलीमा लागुऔषधसम्बन्धी अपराध बढ्दो, प्रहरीको कडा निगरानी र कारबाही

भदौ ६, सोलुखुम्बु । जिल्ला प्रहरी कार्यालय सिन्धुलीका अनुसार आर्थिक वर्ष ०८१र०८२ मा लागुऔषधसँग सम्बन्धित ४६ वटा मुद्दा दर्ता भएका छन्। सो अवधिमा ९३ जना व्यक्तिलाई पक्राउ गरी उनीहरूमाथि कानुनी कारबाही प्रक्रिया अगाडि बढाइएको छ। प्रहरी तथ्यांक अनुसार पक्राउ परेका व्यक्तिहरूमध्ये ८४ जना पुरुष, ७ जना महिला र २ जना तेस्रोलिंगी पुरुष रहेका छन्। यस्तै, लागुऔषध कारोबारमा संलग्न ४ जना अझै फरार रहेको र उनीहरूको खोजी कार्य तीव्र पारिएको प्रहरीले जनाएको छ।

लागुऔषध नियन्त्रणका लागि विभिन्न स्थानमा गरिएको छापा र अनुसन्धानको क्रममा प्रहरीले ठूलो मात्रामा लागुऔषध बरामद गर्न सफल भएको छ। बरामद गरिएको सामग्रीमा ३८४ ग्राम २३३ मिलिग्राम खैरो हेरोइन, २९४ किलो ६९४ ग्राम गाँजा, ३१,९१० थान ट्याब्लेट, २१ बोतल विन्सरेक्स र ७३ बोतल एक्सिप्लन न्यू रहेका छन्। यी तथ्यांकले जिल्लामा खैरो हेरोइन, गाँजा लगायत ट्याब्लेट र झोल पदार्थका रूपमा प्रयोग हुने लागुऔषधको प्रयोग बढ्दो क्रममा रहेको देखाएको छ।

जिल्ला प्रहरी कार्यालयका प्रमुख सुवेदीले लागुऔषध कारोबारमा संलग्नहरूलाई कडा भन्दा कडा कारबाही गरिने चेतावनी दिँदै यसको सञ्जाल तोड्न प्रहरीले अझ सक्रियता देखाउने प्रतिबद्धता व्यक्त गर्नुभएको छ। साथै, उनले लागुऔषध नियन्त्रणका लागि विशेष अभियान सञ्चालन गर्नुका साथै जनचेतनामूलक कार्यक्रमहरू सञ्चालन गर्नुपर्ने आवश्यकता रहेकोमा जोड दिनुभएको छ।