कोशी प्रदेशको आम सञ्चार विधेयकप्रति महासङ्घको विरोध

साउन ६, सोलुखम्बु । नेपाल पत्रकार महासङ्घले कोशी प्रदेश सरकारले ल्याएको ‘आम सञ्चार सम्बन्धी विधेयक’ प्रेस स्वतन्त्रतामाथि आघात गर्ने खालको भएको भन्दै गम्भीर ध्यानाकर्षण गराएको छ । महासङ्घका अनुसार ‘कोशी प्रदेश आमसञ्चारका सम्बन्धमा व्यवस्था गर्न बनेको विधेयक २०८१’ ले सञ्चारमाध्यमलाई डेढ लाख रुपैयाँसम्म जरिवाना र इजाजत पत्र खारेज गर्ने जस्ता कठोर प्रावधानहरू समेटेको छ ।

उक्त विधेयक प्रदेश सभाको न्याय प्रशासन तथा विधायन समितिबाट पारित भई अघि बढेको छ । महासंघ कोशी प्रदेश समितिले सो कदमलाई ‘लोकतान्त्रिक प्रक्रियाको अवमूल्यन र बलपूर्वक कठोर कानुन ल्याउने प्रयास’ भन्दै आपत्ति जनाउँदै आएको छ । महासङ्घले संविधान विपरीत सञ्चारमाध्यमको दर्ता खारेजजस्ता निरङ्कुश प्रावधान सच्याउन माग गर्दै, नसच्याए प्रतिरोधमा उत्रिने चेतावनी दिएको छ ।