जिल्ला ट्राफिक प्रहरी कार्यालय सोलुले गर्यो एक महिनामा १०५ वटा सवारीलाई कारबाही

भदौ ७, सोलुखुम्बु । चालु आर्थिक वर्ष २०८२/८३ को पहिलो महिनामा जिल्ला ट्राफिक प्रहरी कार्यालय सोलुखुम्बुले १ सय बढी वटा सवारीसाधनलाई विभिन्न कारणमा कारबाही गरेको छ । ट्राफिक नियम उल्लंघन गर्ने सवारीसाधनबाट साउन महिनामा मात्र १०५ वटा सवारीलाई कारबाही गरेको हो ।

कार्यालयका प्रहरी सहायक हवल्दार चन्द्र बहादुर बस्नेतका अनुसार कारबाहीबाट १ लाख २६ हजार ५०० रुपैयाँ राजस्व संकलन गरिएको हो । साउन महिनामा ८ वटा ट्रक कारबाहीमा पर्दा ८ हजार, ३ वटा टिपर कारबाहीमा पर्दा २ हजार ५००, १ वटा बस कारबाहीमा पर्दा १ हजार र ४५ वटा कार तथा जिप कारबाहीमा पर्दा ४३ हजार ५०० रुपैयाँ राजस्व संकलन भएको कार्यालयको तथ्याङ्कमा उल्लेख गरिएको छ ।

यस्तै, ४ वटा ट्याक्टर कारबाहीमा परेका थिए जसबाट ५ हजार, ३७ वटा मोटरसाइकल कारबाहीमा पर्दा ६१ हजार र ७ वटा टेम्पो तथा अटो कारबाहीमा पर्दा ५ हजार ५०० रुपैयाँ राजस्व उठाइएको छ । गत वर्षको यही अवधिमा २३६ वटा सवारीसाधन कारबाहीमा परेका थिए, जसबाट २ लाख २४ हजार ५०० रुपैयाँ राजस्व संकलन गरिएको थियो ।

यस वर्ष कारबाही संख्या घटेसँगै राजस्व संकलनमा समेत उल्लेख्य गिरावट आएको देखिएको छ । कार्यालयका अनुसार सवारी साधनले प्रयोजन विपरीत सञ्चालन गर्ने, क्षमता भन्दा बढी यात्रु वा सामान बोक्ने, मदिरा सेवन (मा.प.से) गरेर सवारी चलाउने, लापरवाहीपूर्ण तरिकाले सवारी सञ्चालन गर्ने जस्ता कारणमा कारबाही गरिएको हो ।