स्थानीय तह संस्थागत क्षमता मुल्याङ्कनमा सोलुदुधकुण्ड जिल्लामै पहिलो 

भाद्र ७, सोलुखुम्बु । सोलुखुम्बुको सोलुदुधकुण्ड नगरपालिका स्थानीय तह संस्थागत क्षमता मूल्याङ्कनमा जिल्लाकै पहिलो भएको छ ।  जिल्लामा रहेका ८ स्थानीय तह मध्ये सबैभन्दा बढी अंक ८४ दशमलव ५० प्राप्त गर्दै प्रथम बनेको हो ।  सङ्घीय मामिला तथा सामान्य प्रशासन मन्त्रालयले शुक्रबार सार्वजनिक गरेको आर्थिक वर्ष २०८०÷८१ को स्वमुल्याङ्कन (लिसा) मा सोलुखुम्बुको सोलुदुधकुण्ड नगरपालिका  जिल्लाको प्रथम  स्थानीय तह भएको मन्त्रालयले जनाएको छ ।  

शासकीय पद्धती र विकास व्यवस्थापनमा गर्नुपर्ने सुधारका क्षेत्रहरु पहिचान गर्ने, आवधिक समिक्षाको आधार प्राप्त गर्ने र स्थानीय सरकारबीच स्वच्छ प्रतिष्पर्धाको भावना जागृत गारउने उदेश्यले कार्यान्वयनमा रहेको लिसामा नगरपालिकाले अघिल्लो वर्ष समेत प्रथम स्थान हासिल गरेको थियो ।     विभिन्न १० वटा बिषयक्षेत्र समेटेर तयार गरिने नतिजामा नगपालिका उत्कृष्ठ भएको मेयर नाम्गेल जाङबु शेर्पाले बताउनुभयो । यस्तै थुलुङ दुधकोशी गाउँपालिकाले ७९ अङ्क प्राप्त गरेको छ ।

खुम्बु पासाङल्हामु गाउँपालिका ७८ अंक प्राप्त गर्न सफल भएको छ ।   यसै गरि महाकुलुङ गाउँपालिका ५८ दशमलव ५७ अङ्क प्राप्त गरेको छ । माप्य दुधकोशी गाउँपालिकाले ६७ दशमलव ५० अङ्क, लिखुपिके गाउँपालिकाले ७९ दशमलव ७५ अङ्क, नेचासल्यान गाउँपालिकाले ७९.२५ र सोताङ गाउँपालिका ५२ दशमलव २५ अङ्कका साथ अन्तिम स्थानमा रहेको छ ।  स्थानीय तहहरूको शासकीय प्रबन्ध, सङ्गठन तथा प्रशासन, वार्षिक बजेट तथा योजना तर्जुमा व्यवस्थापन, वित्तिय एवम् आर्थिक व्यवस्थापन, सेवा प्रवाह, न्यायिक कार्य सम्पादन, भौतिक पूर्वाधार, समाजिक समावेशीकरण, वातावरण संरक्षण तथा विपद् व्यवस्थापन साथै सहकार्य र समन्वय लगायतमा मुल्यांकन गर्ने गरिन्छ ।

 देशभरका स्थानीय तहमा संस्थागत क्षमता स्वमूल्याङ्कन (एलआईएसए–लिजा) कार्यान्वयनमा रहेको छ  । स्थानीय तह संस्थागत क्षमता स्वमूल्याङ्कन कार्यविधि, २०७७ जारी गरी सङ्घीय मामिला तथा सामान्य प्रशासन मन्त्रालयले स्थानीय तहको हरेक आर्थिक वर्षमा स्वमूल्याङ्कन गर्ने गर्दछ ।उहाँले लिसाबाट प्राप्त नतिजाले नगरपालिकालाइ कार्य सम्पादनमा थप हाैसला मिलेकाे उल्लेख गर्नभयाे ।