हुलाक कार्यालय सोलुखुम्बुले गर्यो एक वर्षमा ५ लाख बढी राजस्व संकलन

भदौ ८, सोलुखुम्बु । जिल्ला हुलाक कार्यालय सोलुखुम्बुले आर्थिक वर्ष २०८१/८२ मा ५ लाख ५४ हजार ७४० रुपैयाँ राजस्व संकलन गरेको छ । कार्यालयले टिकट बिक्री, बैदेशिक पार्सल सेवा र बारकोड सेवाबाट यो राजस्व संकलन गरेको हो ।

कार्यालयका खरिदार उर्मिला भट्टराईका अनुसार, टिकट बिक्रीबाट ३ लाख ९६ हजार ४०० रुपैयाँ, बैदेशिक पार्सल सेवा बाट २१ हजार ६५५ रुपैयाँ, र बारकोड सेवा मार्फत १ लाख ३१ हजार ९६० रुपैयाँ राजस्व संकलन गरिएको हो । कार्यालयले आर्थिक वर्ष २०८१/८२ मा १ हजार २६० वटा साधारण चिठी र २ हजार ४९६ वटा रजिष्ट्री चिठी जिल्ला भित्र पठाइएको जनाएको छ ।

यस्तै, विदेशबाट प्राप्त चिठीमा १५५ वटा साधारण र १६० वटा रजिष्ट्री चिठी प्राप्त भएका थिए । जिल्लाबाट अन्य जिल्ला तथा विदेश पठाइएका चिठीको विवरण अनुसार, १ हजार १५० वटा साधारण र २ हजार ४७१ वटा रजिष्ट्री चिठी अन्य जिल्लामा पठाइएका थिए । त्यस्तै, विदेशतर्फ ११ वटा साधारण र १५ वटा रजिष्ट्री चिठी पठाइएको कार्यालयले जनाएको छ ।

गत आर्थिक वर्ष २०८०/८१ मा कार्यालयले ६ लाख १३ हजार ५६५ रुपैयाँ राजस्व संकलन गरेको थियो । सो मध्ये ३ लाख ९९ हजार ५६० रुपैयाँ टिकट बिक्रीबाट संकलन भएको थियो ।