साकेला गाउँपालिकामा जनश्रमदान अभियान जारी, सडक मर्मतदेखि बोटबिरुवा रोपाइँसम्म

भदौ ८, सोलुखुम्बु । खोटाङ जिल्लाको साकेला गाउँपालिकामा सरसफाइ र संरचना सुधारका लागि सञ्चालन गरिएको जनश्रमदान अभियान निरन्तर जारी छ। वर्षाले बिगारेका ग्रामीण सडकको मर्मत, नाली सफाइ, फोहर व्यवस्थापन र हरियाली प्रवर्द्धनजस्ता कार्यलाई प्राथमिकतामा राख्दै पालिकाले जनश्रमदानी अभियानलाई तीव्रता दिएको हो। अभियान अन्तर्गत सडक छेउमा पलाएका झारपात हटाउने, फालिएका फोहर संकलन गरी व्यवस्थापन गर्ने तथा सडक किनारामा विभिन्न प्रजातिका फलफूलका बिरुवा रोप्ने कार्य भइरहेको छ।

यस अभियानमा गाउँपालिका अध्यक्ष रविप्रकाश राई स्वयं सक्रिय रुपमा सहभागी हुनुका साथै उपाध्यक्ष बिर्सिका राई, विभिन्न वडाध्यक्ष तथा स्थानीय बासिन्दाहरूको उल्लेखनीय सहभागिता रहेको छ। स्थानीय नागरिकलाई आवतजावतमा सास्ती नहोस् भन्ने उद्देश्यले म स्वयं कर्मचारी र प्राविधिकको साथमा सडक मर्मतमा खटिरहेको अध्यक्ष राईले बताउनुभयो। उहाँका अनुसार अहिले साप्सुखोला–मानेभञ्ज्याङ–पाँचधारे सडक, बाँझेच्यानडाँडा–रतन्छा–मानेभञ्ज्याङ सडक, कात्तिके–सोस्तुङ–रतन्छा नैनेपाटी सडकलगायतका मुख्य तथा सहायक सडकहरू मर्मत भइरहेको छ।

साथै पालिकाभित्रका बजार, उद्यान, कार्यालय परिसर तथा सार्वजनिक स्थलहरूमा सरसफाइको कामसँगै फलफूल तथा वनस्पतिको बिरुवा रोपेर हरियाली अभियान पनि एकसाथ अगाडि बढाइएको छ। गाउँपालिकाले उपलब्ध गराएको उपकरण तथा सीमित प्राविधिक सहयोगका आधारमा दैनिक रूपमा जनश्रमदान कार्य सञ्चालन भइरहेको छ। सफा, हरित र व्यवस्थित पालिका निर्माणको लक्ष्यसहित अघि बढाइएको यो अभियानले सामुदायिक एकता, नागरिक चेतना र स्थानीय विकासमा सकारात्मक सन्देश प्रवाह गरेको छ।