सामाजिक मेलमिलाप युवा समूहद्वारा आयोजित तीज विशेष कार्यक्रम भव्य रूपमा सम्पन्न

भदौ ११, सोलुखुम्बु । सोलुखुम्बुको थुलुङ दुधकोशी गाउँपालिका–२ काँगेलमा हरितालिका तीजको अवसरमा सामाजिक मेलमिलाप युवा समूहले विशेष कार्यक्रमको आयोजना गरेको छ । मंगलबार  भव्यता, उत्साहपूर्ण रुपमा उक्त कार्यक्रम सम्पन्न भएको हो ।

कार्यक्रममा पारम्परिक संगिनी नाच, म्युजिकल चियर, हन्डी फोड लगायतका मनोरञ्जनात्मक प्रस्तुति समावेश गरिएको थियो। सहभागी महिलाहरूले परम्परागत तीजका पहिरनमा सजिएर सामूहिक नृत्य प्रस्तुत गरेका थिए, जसले कार्यक्रमको आकर्षणलाई थप बढाएको थियो ।

सामाजिक मेलमिलाप युवा समूहका पूर्व सचिव युवराज बस्नेतले कार्यक्रमको सफल आयोजनामा सम्पूर्ण टोलबासी तथा सहभागीहरूको योगदान महत्वपूर्ण रहेको बताउँदै, यस्तो सांस्कृतिक कार्यक्रमले समुदायमा सामूहिकता, मेलमिलाप र सांस्कृतिक जगेर्नालाई प्रवद्र्धन गर्ने उल्लेख गर्नुभयो । कार्यक्रममा सहभागिता जनाएका प्रतियोगीहरूलाई पुरस्कार वितरण गरिएको थियो ।

साथै, वर्तमान सचिव एवं जिवन ज्योति उच्च माविका शिक्षक सन्जिव बस्नेतले तीजको सांस्कृतिक महत्वबारे सम्बोधन गर्दै महिलाको अधिकार, आत्मसम्मान र उत्सवको भावना अभिव्यक्त गर्ने पर्वको रूपमा तीजलाई बुझ्नुपर्ने धारणा राख्नुभयो ।