भदौ ११, सोलुखुम्बु । अविरल वर्षाका कारण सोलुखुम्बुमा बाढी, पहिरो तथा अन्य प्राकृतिक विपद् उत्पन्न भएपछि प्रभावितलाई तत्काल राहत र पुनःस्थापनाका लागि जिल्ला स्तरीय समन्वयात्मक बैठक सम्पन्न भएको छ। जिल्लाका तहगत सरकारी निकायहरूको उपस्थितिमा सम्पन्न बैठकले प्रभावित क्षेत्रको तत्काल उद्धार, राहत तथा पुनःस्थापना कार्यलाई प्राथमिकतामा राखी आवश्यक सहयोगका लागि संघ र प्रदेश सरकारसहित विभिन्न सरकारी तथा गैरसरकारी संस्थाहरू समक्ष अनुरोध पठाउने निर्णय गरेको छ।
थुलुङ दुधकोशी गाउँपालिका वडा नम्बर ६ का वडा अध्यक्ष महेन्द्रदिप राईका अनुसार, बैठकमा विपद् प्रभावित अवस्थाको विवरण संकलन गरी पीडितको तथ्यांक तथा आवश्यकतासहित जिल्ला प्रशासन कार्यालयमार्फत प्रदेश र संघ सरकारलाई माग पेश गर्ने निर्णय समेत गरिएको छ। त्यसैगरी, विपद् जोखिम न्यूनीकरणका लागि तारजाली, खानेपानी, सिंचाइ लगायतका संरचनागत समस्या समाधान र विपद् व्यवस्थापनमा आवश्यक सामाग्रीहरूको तत्काल व्यवस्थापन गर्नुपर्ने निष्कर्ष बैठकले निकालेको छ।
जिल्ला विपद् व्यवस्थापन समिति तथा स्थानीय निकायहरूबीच अझ मजबुत समन्वय गरी उद्धार, राहत तथा पुनःस्थापनाका कार्यलाई तिव्रता दिने गरी कार्ययोजना अघि बढाइने निर्णय समेत बैठकले गरेको छ। जिल्लावासीलाई सम्भावित जोखिमबाट सचेत रहन आग्रह गर्दै सम्बन्धित निकायहरूले आवश्यक तयारी र सतर्कता अपनाउन पनि बैठकले सुझाव दिएको छ।
Discussion about this post