भदौ १२, सोलुखुम्बु । ओखलढुंगाको मोलुङ गाउँपालिका वडा नं ४, हर्कपुरको माझखर्कमा साउन ३१ गते परेको चट्याङबाट पीडित परिवारलाई नेपाली कांग्रेस मोलुङ–४ कार्यसमितिले ७८ हजार रुपैयाँ सहयोग रकम हस्तान्तरण गरेको छ। वडा सभापति एवं वडा अध्यक्ष भोलाराज राई र वडा सदस्य मेख बहादुर तामाङको उपस्थितिमा चट्याङ लागेर ज्यान गुमाएका स्व. वीरबहादुर तामाङको परिवारलाई ४५ हजार रुपैयाँ नगद सहयोग प्रदान गर्दै गहिरो समवेदना प्रकट गरिएको छ।
यसैगरी, घाइते भइसकेका भिसण तामाङ, मुना तामाङ, डोल्मा तामाङ, प्रेम बहादुर तामाङ, सुजन तामाङलगायतका परिवारलाई जनही ५ हजारका दरले सहयोग हस्तान्तरण गरिएको थियो। साथै, एउटै परिवारका सरिता तामाङ र विष्णु कुमारी तामाङको परिवारलाई एकमुष्ट ७ हजार रुपैयाँ सहयोग गरिएको छ। उक्त सहयोग रकम काठमाडौंमा विभिन्न पेशा–व्यवसायमा संलग्न मोलुङ–४ हर्कपुरका कांग्रेसका क्रियाशील युवाहरूको पहलमा संकलन गरिएको हो।
संकलन गरिएको रकममा ओखलढुंगाका सांसद रामहरि खतिवडाबाट २० हजार, कांग्रेसका नेता तथा ट्रेड युनियनका पूर्व केन्द्रीय अध्यक्ष खिलानाथ दाहालबाट ३ हजार, नेता हरि दाहालबाट १० हजार, सुनकोशी गाउँपालिका अध्यक्ष कमल तामाङबाट ५ हजार, कांग्रेस नेत्री सङ्गीता तामाङबाट ३ हजार रुपैयाँ सहयोग प्राप्त भएको हो। बाँकी रकम मोलुङ–४ का स्थानीय युवा तथा कांग्रेस कार्यकर्ताहरूबाट जुटाइएको हो।
Discussion about this post