नेपाल शिक्षक महासंघ सोलुखुम्बुद्वारा भदौ १३ गते आठवटै पालिकामा धर्ना कार्यक्रम

भदौ १२, सोलुखुम्बु । नेपाल शिक्षक महासंघ जिल्ला कार्यसमिति सोलुखुम्बुले शिक्षा ऐनको कार्यान्वयन र शिक्षकका हकहितको माग गर्दै भदौ १३ गते सोलुखुम्बुका आठवटै स्थानीय तहमा एकसाथ धर्ना कार्यक्रम सञ्चालन गर्ने भएको छ । नेपाल शिक्षक महासंघले विगतमा सरकारले शिक्षकसँग गरेका सम्झौताहरू कार्यान्वयन नगरेको भन्दै पुनः दबाबमूलक कार्यक्रम अघि सारेको हो ।

महासंघले जारी सर्कुलर अनुसार, शैक्षिक गुणस्तरको अभिवृद्धि र शिक्षकको हक अधिकार सुनिश्चित गर्न लक्षित गर्दै भोलि भदौ १३ गते देशभरका स्थानीय तहहरूमा ध्यानाकर्षण पत्र बुझाउने र धर्ना कार्यक्रम आयोजना गरिने जानकारी गराइएको छ । नेपाल शिक्षक महासंघ जिल्ला कार्यसमिति सोलुखुम्बुका अध्यक्ष जनक कुमार थापाका अनुसार जिल्लाका आठवटै पालिकामा स्थानिय शिक्षक महासंघ समितिको समन्वयमा ब्यानरसहितको शान्तिपूर्ण धर्ना कार्यक्रम सञ्चालन गरिनेछ ।

कार्यक्रममा पालिकास्तरका महासंघ प्रतिनिधिहरू, आवद्ध संघसंस्था तथा शिक्षकहरूको सहभागिता रहने छ । महासंघले शिक्षा ऐन छिटो भन्दा छिटो जारी गर्न, विगतका सम्झौता कार्यान्वयन गर्न र शिक्षकको सामाजिक सुरक्षा तथा पेशागत अधिकारको सुनिश्चितता गर्न सरकारलाई ध्यानाकर्षण गराउँदै आएको छ ।