तिङ्लामा हाइड्रोपावर प्रभावितलाई च्याउ खेती तालिम तथा सामाग्री वितरण

भदौ १२, सोलुखुम्बु । सोलुखुम्बुको सोलुदुधकुण्ड नगरपालिका–११ तिङ्लाले ८२ मेगावाट क्षमताको निर्माणाधीन जलविद्युत आयोजना (हाइड्रोपावर) बाट प्रभावित क्षेत्रका स्थानीयलाई च्याउ खेती सम्बन्धी तालिम तथा सामग्री वितरण गरेको छ । वडा अध्यक्ष टङ्कबहादुर कार्कीको पहल र नेतृत्वमा सञ्चालन गरिएको उक्त कार्यक्रममा करिब ४० घरधुरी सहभागी भएका थिए ।

सहभागीहरूलाई व्यावसायिक कृषि प्रविधि, च्याउ उत्पादन तथा त्यसको व्यवस्थापनसम्बन्धी सीप प्रदान गर्नुका साथै आवश्यक सामग्रीहरू समेत वितरण गरिएको वडा कार्यालयले जनाएको छ । कार्यक्रम तिङ्ला क्षेत्रमा जलविद्युत परियोजनाको प्रभाव परेका परिवारहरूको जीवनस्तर उकास्ने, वैकल्पिक रोजगारी सिर्जना गर्ने र दीगो जीवनोपार्जनतर्फ स्थानीयलाई उन्मुख गराउने उद्देश्यले आयोजना गरिएको हो ।

वडा अध्यक्ष कार्कीले तालिम कार्यक्रमले समुदायमा उत्पादनमुखी सोचको विकास गर्ने विश्वास व्यक्त गर्दै आगामी दिनमा अझ फराकिलो परिप्रेक्ष्यमा यस्ता कार्यक्रम सञ्चालन गरिने बताउनुभयो । स्थानीय सहभागीहरूले तालिम उपयोगी र व्यवहारिक रहेको जनाउँदै यसले आर्थिक उन्नतिमा सहयोग पुर्याउने अपेक्षा व्यक्त गरेका छन् ।