स्थानीय तहहरूबीच सहकार्य र साझेदारी प्रवद्र्धन गर्न सोलुखुम्बुमा अन्तरक्रिया कार्यक्रम

भदौ १२, सोलुखुम्बु । सोलुखुम्बुमा स्थानीय तहहरूबीच सहकार्य, समन्वय र अनुभव साझेदारीलाई थप बलियो बनाउने उद्देश्यले कृषि केन्द्रित अन्तरक्रिया कार्यक्रम सम्पन्न भएको छ । जिल्ला समन्वय समितिको आयोजनामा सम्पन्न उक्त कार्यक्रममा जिल्लाका विभिन्न गाउँपालिका र नगरपालिकाका प्रतिनिधिहरूले आ–आफ्ना सफल अभ्यास तथा चुनौतीहरू प्रस्तुत गर्दै आपसी सिकाइको वातावरण सिर्जना गरेका छन् ।

जिल्ला समन्वय समितिका प्रमुख कृष्ण प्रसाद निरौलाको अध्यक्षतामा सम्पन्न कार्यक्रममा आर्थिक बर्ष २०८१÷८२ मा स्थानीय तहहरूले गरेका उपलब्धिहरू प्रस्तुत गरिएको थियो । कार्यक्रममा खुम्बु पासाङ ल्हामु गाउँपालिका, लिखु पिके गाउँपालिका, नेचासल्यान गाउँपालिका, थुलुङ दुधकोशी गाउँपालिका, सोलुदुधकुण्ड नगरपालिका र सोताङ गाउँपालिकाका प्रमुख प्रशासकीय अधिकृतहरूले आ–आफ्ना क्षेत्रका उपलब्धिहरू प्रस्तुत गर्नुभएको थियो ।

प्रस्तुतिहरूमा शिक्षा, स्वास्थ्य, भौतिक पूर्वाधार, कृषिको प्रवद्र्धन, दिगो विकास, सामाजिक सशक्तीकरण लगायतका क्षेत्रमा गरिएको सकारात्मक कामहरूको उल्लेख गरिएको थियो । उक्त कार्यक्रममा जिल्ला समन्वय समितिका प्रमुख कृष्ण प्रसाद निरौला, प्रमुख जिल्ला अधिकारी लिला कुमारी केसी पाण्डे, जिल्लाका जनप्रतिनिधि कर्मचारी लागयत अन्य सरोकारवाला निकायहरुको उपस्थिती रहेको थियो ।