भकञ्जे स्वास्थ्य चौकीले पाउने भयो आफ्नै एम्बुलेन्स

भदौ १३, सोलुखुम्बु । ग्रामीण भेगमा आपतकालीन स्वास्थ्य सेवामा देखिँदै आएको ठूलो समस्यालाई सम्बोधन गर्दै, लिखुपिके गाउँपालिका–५ स्थित भकञ्जे स्वास्थ्य चौकीले पहिलोपटक आफ्नै एम्बुलेन्स पाउने भएको छ । हिमालयन गुगे नेपालको आर्थिक सहयोगमा उपलब्ध गराइने यो एम्बुलेन्सले स्थानीय स्वास्थ्य सेवा प्रणालीमा महत्वपूर्ण सुधार ल्याउने अपेक्षा गरिएको छ । भकञ्जेमा हालै सम्पन्न विशेष बैठकले ऐतिहासिक मोड लिएको छ ।

बैठकमा हिमालयन गुगे नेपालका कार्यकारी निर्देशक टाँसी फिन्जो र उहाँकी श्रीमती सुष्मा गुरुङको सक्रिय सहभागिता थियो । स्थानीय तर्फबाट वडा अध्यक्ष ङिमा छिरि लामाले औपचारिक रुपमा मागपत्र प्रस्तुत गर्दै एम्बुलेन्सको आवश्यकता स्पष्ट रूपमा राखेका थिए । निर्देशक फिन्जोले तत्कालै उक्त मागलाई सम्बोधन गर्दै एम्बुलेन्स उपलब्ध गराउने प्रतिबद्धता व्यक्त गर्नुभएको छ । सवारी सुविधा अभावका कारण आपतकालीन अवस्थाहरूमा बिरामीलाई अस्पतालसम्म लैजान अत्यन्त कठिन हुने गरेको छ ।

निजी एम्बुलेन्स सेवा महँगो पर्ने भएकाले धेरैजसोले समयमै उपचार पाउने मौका गुमाउँदै आएका थिए । अब भने आफ्नै एम्बुलेन्स हुँदा यस्तो स्थिति न्यूनीकरण हुने आशा गरिएको छ । यो सहयोग केवल एउटा एम्बुलेन्सको उपलब्धता मात्र नभई, निजी संस्थाले सामुदायिक उत्तरदायित्वप्रति देखाएको प्रतिवद्धताको उदाहरण समेत बनेको छ ।

हिमालयन गुगे नेपालले दुर्गम भेगका स्वास्थ्य संरचना सुदृढ गर्न गरेको प्रयासलाई स्थानीय जनप्रतिनिधिहरूले सराहना गरेका छन् । चन्द्र ज्योति माध्यमिक विद्यालयका लेखा कर्मचारी देबिन बस्नेतले दिएको जानकारीअनुसार, एम्बुलेन्स आगामी आर्थिक वर्ष २०८२÷८३ भित्रै सञ्चालनमा ल्याइनेछ ।