एभरेष्ट–दुधकोशी कल्चरल ट्रेलको औपचारिक शुरुवात हुँदै, नयाँ पर्यटकिय गन्तव्यको थप सम्भावना

भदौ १३, सोलुखुम्बु । सोलुखुम्बुको माप्यदुधकोशी गाउँपालिकाले नयाँ पर्यटकिय पदमार्ग “एभरेष्ट–दुधकोशी कल्चरल ट्रेल” को औपचारिक शुरुवात गर्ने भएको छ । लामो समयदेखि पर्यटन विकासमा केन्द्रित खोज, अनुसन्धान र तयारी गर्दै आएको गाउँपालिकाले भाद्र १६ गते सोमबार काठमाण्डौंको भृकुटीमण्डपस्थित नेपाल पर्यटन बोर्डमा आयोजना हुने विशेष कार्यक्रममार्फत पदमार्गको सार्वजनिक घोषणा गर्ने भएको हो ।

नेपाल पर्यटन बोर्ड र ट्रेकिङ एजेन्सिज एशोसियसन अफ नेपाल (टान) को सहकार्यमा सञ्चालित “जीविकोपार्जन पुनरुत्थानका लागि दिगो पर्यटन” कार्यक्रमअन्तर्गत आर्थिक सहयोग प्राप्त यस परियोजनाले पाँचदेखि नौ दिनभित्र पूरा गर्न सकिने पदयात्रा प्रस्ताव गरेको छ । माप्यदुधकोशी गाउँपालिकाका उपाध्यक्ष गौरव राई का अनुसार, यो पदमार्गले सगरमाथा लगायतका हिमश्रृङ्खलाको मनोरम दृश्य, पहाडी तथा हिमाली गाउँहरूको जीवनशैली, समृद्ध संस्कृति, गुराँसका वन र रक क्लाईम्बिङको प्रचुर सम्भावना समेट्नेछ ।

यसअघि पनि गाउँपालिकाले पदमार्ग प्रवद्र्धनका लागि म्याराथन, प्रचारात्मक कार्यक्रम, रक क्लाईम्बिङ अभ्यास तथा सम्भाव्यता अध्ययनजस्ता कार्यहरू गर्दै आएको छ । एभरेष्ट–दुधकोशी कल्चरल ट्रेल को विकासले सोलुखुम्बुको पर्यटन क्षेत्रलाई नयाँ उचाइमा पुर्याउने विश्वास गरिएको छ । स्थानीय समुदायको जीवनस्तर उकास्नका साथै दिगो पर्यटनको नमुना स्थापनाको लक्ष्यसहित यो परियोजना अघि बढाइएको हो ।