आज विश्व बेपत्ताविरुद्धको दिवस

भदौ १४, सोलुखुम्बु । आज विश्व बेपत्ताविरुद्धको दिवस, नेपालमा पनि विभिन्न कार्यक्रम गरी मनाईंदैछ । जबरजस्ती बेपत्ता पारिएका व्यक्तिलाई सम्मान र श्रद्धाञ्जली दिन हरेक वर्ष अगस्ट ३० तारिखमा यो दिवस मनाउने गरिन्छ । नेपालमा पछिल्लो द्धन्द्धपछि शान्ति सम्झौता भएको १९ वर्ष भइसकेको छ । कतिपय बेपत्ता भएकाहरुको अवस्था अझै थाहा हुन सकेको छैन । आफ्ना आफन्त फर्केर आउँछन् भन्ने आसमा रहेका परिवारका सदस्यले कि त सास, कि त लास चाहिने माग राख्दै आएका छन् ।

राष्ट्रिय मानवअधिकार आयोगले द्वन्द्व प्रभावितलाई विश्वासमा लिएर सङ्क्रमणकालीन न्यायलाई टुङ्गोमा पुर्‍याउन सरकारसँग आग्रह गरेको छ । नेपालमा १० वर्षसम्म चलेको द्वन्द्वकालमा बलपूर्वक बेपत्ता पारिएका व्यक्तिको अवस्था अझै पनि सार्वजनिक हुन नसकेको विषयलाई गम्भीर रूपमा लिएर प्रकियालाई तत्काल निष्कर्षमा पुर्‍याउन आयोगले आग्रह गरेको हो । आयोगका प्रवक्ता डा। टीकाराम पोखरेलले बेपत्ताविरुद्धको दिवसको अवसरमा निकालेको विज्ञप्तिमा बेपत्ता पारिएका व्यक्तिको अवस्था सार्वजनिक गर्न माग गरिएको छ ।

विस्तृत शान्ति सम्झौताको १९ वर्ष पूरा हुनै लाग्दा पनि बेपत्ता पारिएका व्यक्तिको अवस्था शान्ति सम्झौताअनुसार सार्वजनिक नहुनु र प्रभावित लामो समयदेखि न्यायको पर्खाइमा रहिरहनु चिन्ताको विषय रहेको आयोगले जनाएको छ ।