भदौ १५, सोलुखुम्बु । शिक्षा ऐन कार्यान्वयनको मागसहित सोलुखुम्बुमा भदौरे पानीमा पनि शिक्षकहरूको धर्ना दिएका छन् । भीषण वर्षा र प्रतिकूल मौसमका बाबजुद पनि शिक्षकहरु आईतबार शिक्षा विकास तथा समन्वय इकाइ सोलुखुम्बुमा धर्नामा बसेका हुन् । शिक्षा ऐनको यथाशीघ्र कार्यान्वयन, विगतका सम्झौता कार्यान्वयन र शिक्षकका पेशागत हकहित सुनिश्चित गर्न माग गर्दै नेपाल शिक्षक महासंघ राष्ट्रिय समितिको नेतृत्वमा धर्ना कार्यक्रम आयोजना गरिएको थियो ।
धर्ना कार्यक्रममा सहभागी शिक्षकहरुले सरकारसमक्ष आफ्नो माग पुनः स्पष्ट रुपमा राखेका छन् । उनीहरुले शिक्षा क्षेत्रको संवेदनशीलतालाई दृष्टिगत गर्दै सरकारले पटक–पटक गरेको बेवास्ताको आलोचना गरेका छन् । धर्नाको क्रममा एक ध्यानाकर्षणपत्र शिक्षा विकास तथा समन्वय इकाइ सोलुखुम्बुका प्रमुख पुण्यराज डंगोललाई बुझाइएको छ । कार्यक्रममा नेपाल शिक्षक महासंघ जिल्ला कार्यसमिति सोलुखुम्बुका अध्यक्ष जनक कुमार थापाले आगामी भदौ २१ गतेबाट राष्ट्रिय स्तरमा दोस्रो चरणको आन्दोलन थालिने जानकारी गराउनु भएको छ । उहाँले सरकारलाई माग सम्बोधन गर्न अन्तिम चेतावनी दिँदै, आन्दोलनरत शिक्षकहरुलाई बेवास्ता गरे आन्दोलन झन चर्किन सक्ने बताउनु भयो । धर्ना कार्यक्रममा विभिन्न शिक्षक संगठनका केन्द्र, प्रदेश र जिल्ला तहका नेताहरुको उल्लेखनीय उपस्थिति रहेको थियो ।
कार्यक्रममा प्रगतिशिल नेपाल राष्ट्रिय शिक्षक संगठनका राष्ट्रिय सचिव होम कुमारी खतिवडा, नेपाल राष्ट्रिय शिक्षक संगठनका राष्ट्रिय सदस्य टंक प्रसाद दाहाल, नेपाल शिक्षक संघ कोशी प्रदेशका अर्थ उपमहासचिव लक्ष्मण कार्की, नेपाल शिक्षक महासंघका सह–अध्यक्ष बाबुराम बस्नेत, नेपाल शिक्षक संघ सोलुखुम्बुका अध्यक्ष मदन कुमार राई, र नेपाल राष्ट्रिय शिक्षक संगठन सोलुखुम्बुका अध्यक्ष खिलक बहादुर कार्कीले आ–आफ्नो धारणा राख्दै शिक्षकहरुको न्यायसंगत मागलाई सरकारको प्राथमिकतामा राख्न आग्रह गरेका छन् । उक्त कार्यक्रमले शिक्षकहरुमा एकता र साझा एजेन्डाप्रति प्रतिबद्धता झल्काएको छ ।
महासंघले यसअघि भदौ १३ गते सोलुखुम्बुका आठवटै स्थानीय तहमा समान कार्यक्रम सम्पन्न गरिसकेको थियो । शिक्षक महासंघले जारी राखेको यो अभियान शिक्षा प्रणालीको सुधार, शिक्षकको पेशागत अधिकार र स्थायीत्वको सुनिश्चितताको लागि गरिएको भन्दै सम्पूर्ण शिक्षक समुदायलाई एकजुट हुन आह्वान गरेको छ ।
Discussion about this post