सगरमाथाको फेदीमा खुल्यो पहिलो पटक स्पा र क्लब 

भदौ १६, सोलुखुम्बु । विश्वकै सर्वोच्च शिखर सगरमाथाको प्रवेशद्वार नाम्चे बजारमा वेलनेस स्पा खुलेको छ ।  स्थानीय युवाहरुको लगानीमा स्वदेशी तथा विदेशी पर्यटकहरूको लागी उच्च हिमाली क्षेत्रमा स्पा सञ्चालनमा ल्याइएको हो ।  ७ करोडको लागतमा सञ्चालनमा ल्याइएको अल्टिच्युड वेलनेसल क्लव तथा स्पाबाट नेपालीहरूले २ हजार ५ सय र विदेशी पर्यटकले ५० डलरमा सेवा पाउने सञ्चालकले जनाएको छ ।

शरद ऋतुको पर्यटकीय सिजनलाई लक्षित गरी  सोमबारबाट बौद्ध धार्मिक परम्परा अनुसार लामाहरु मार्फत पूजा गराएर अल्टिच्युड वेलनेस क्लब एण्ड स्पा सञ्चालनमा ल्याइएको जनाइएको छ । जिल्लामै पहिलो पटक उच्च हिमाली क्षेत्रमा सञ्चालनमा आएको स्पाले काठमाण्डौकै स्तरमा अत्याधुनिक व्यवस्थापन सहित खुलेको वेलनेस क्लबले पर्यटकहरूलाई चिसो तथा सर्दी लाग्ने समस्यालाई हेरेर सेवा दिने सञ्चालक छिमिकाल्देन शेर्पाले बताउनुभयो । पर्यटकीय गतिविधि बढेसँगै खुम्बु क्षेत्र सुविधासम्पन्न बन्दै गएको छ ।  स्पाबाट पर्यटकहरूले सङ्गीत, सैलुन, अनुभवी थेरापिस्टहरूबाट थेरापी, थाइ मसाज, नेपाली परम्परागत मसाज सहित विभिन्न ८ प्रकारमा मसाज सम्बन्धी सेवा प्राप्त गर्ने छन् ।