सेवाग्राही खोज्दै जन्तेढुङ्गा सहरमा, सुनसरीबाट सेवा शिविर सुरु 

भदौ १६, सोलुखुम्बु । खोटाङको जन्तेढुङ्गा गाउँपालिकाले पालिकाबाहीर बसोबास गरिरहेका पालिकाबासीलाई लक्षित गरि सोमबारबाट विभिन्न सहरहरुमा शिविर सुरु गरेको छ । तराईसँग सिधा नाका जोडिएको पालिकाले पुर्वि जिल्लाका तराई क्षेत्रमा बसोबास गरिरहेका पालिकाबासीहरुका लागी साथै काठमाण्डौमा रहेका पालिकाबासीहरुका लागी सहर केन्द्रित शिविरको थालनी गरेको हो ।
शिविरको सुरुवात गाउँपालिकाले इटहरीबाट गरेको छ ।  सोमबार र मङ्गलबार दुई दिन इटहरीमा सेवा दिने गाउँपालिकाका सूचना अधिकारी विनय निरौलाले बताउनुभयो । इटहरी केन्द्रित शिविर इटहरी उपमहानगरपालिकाको दुर्गा पार्टी प्यालेसबाट सञ्चालन हुन छ ।  यस्तै आगामी १९ र २० गते २ दिन चौदण्डीगढी नगरपालिका बेल्टार स्थीत सिटी हल मार्फत सेवा प्रवाह हुने छ भने काठमाण्डौ उपत्यकामा रहेका पालिकाका सेवाग्राही लक्षित शिविर आगामी २३ र २४ गते २ दिन सिद्धार्थ कटेज तिनकुने काठमाण्डौबाट प्रबाह हुने छ ।

 नागरिकहरूले वर्षायामको समयमा ठुलो कष्ट खेपेर पालिका पुग्नु पर्ने बाध्यतालाई अन्त्य गर्न शिविर सम्बन्धित सहरहरुमा लगिएको गाउँपालिका अध्यक्ष अरुणा देवी राईले बताउनुभयो ।  शिविरमा पञ्जिकरण सम्बन्धी सेवाहरुका साथै अन्य प्रशासनिक सेवाहरू प्रदान गर्ने पालिकाले जनाएको छ ।