तीन आर्थिक वर्षमा आयुर्वेद स्वास्थ्य केन्द्र सोलुखुम्बुबाट ११ हजार ७ सय बढीले लिए सेवा

भदौ १६, सोलुखुम्बु । जिल्ला आयुर्वेद स्वास्थ्य केन्द्र सोलुखुम्बुबाट पछिल्ला तीन आर्थिक वर्षको अवधिमा ११ हजार ७ सयभन्दा बढी नागरिकले सेवा लिएका छन् । कार्यालयको तथ्याङ्क अनुसार आर्थिक वर्ष २०७९/०८० देखि २०८१/०८२ सम्म ११ हजार ७ सय ८३ जनाले विभिन्न आयुर्वेदिक सेवा प्राप्त गरेका हुन् । केन्द्रका सूचना अधिकारी केशव ढुंगानाका अनुसार, आर्थिक वर्ष २०७९/०८० मा ५ हजार ३० जना, २०८०/०८१ मा ३ हजार ३ सय २२ जना र २०८१/०८२ मा ३ हजार ३१ जनाले सेवा लिएका थिए ।

जिल्ला आयुर्वेद स्वास्थ्य केन्द्रमार्फत पूर्वकर्म सेवा, जेष्ठ नागरिक सेवा, स्तनपान गराइरहेका आमाका लागि विशेष सेवा, ओपीडी सेवा, योग सेवा तथा योग थेरापी सेवा जस्ता विविध सेवा प्रदान गरिँदै आएको छ । नागरिकहरूलाई स्थानीय तहमै आयुर्वेद सेवा उपलब्ध गराउने उद्देश्यले जिल्लाका आठ वटै स्थानीय तहमा ‘नागरिक आरोग्य सेवा केन्द्र’ स्थापना गरिएको छ ।

तीमध्ये हालसम्म ६ वटा स्थानीय तहमा सेवा संचालनमा आइसकेको र बाँकी रहेका खुम्बु पासाङल्हामु गाउँपालिका तथा लिखुपिके गाउँपालिकामा यस चालु आर्थिक वर्षबाट सेवा प्रारम्भ गरिएको केन्द्रका प्रमुख अमिन्द्र कुमार पण्डितले जानकारी दिनुभयो । प्रमुख पण्डितका अनुसार आयुर्वेदिक सेवालाई अझ गुणस्तरीय, प्रभावकारी र समावेशी बनाउँदै लैजानका लागि कार्यालयले निरन्तर प्रयास गरिरहेको छ ।